“ညောင် “ညောင် ““ညောင်” “ညောင်”
စူပါမားကတ်မှာ ဈေးဝယ်ပြီး အပြန် ဓါတ်လှေကားထဲ ဝင်ကာနီးဆဲဆဲမှာ တညောင်ညောင် အော်သံနဲ့အတူ ကြောင်မအိုကြီး ရောက်လာတာမို့ လက်ထဲကဝယ်လာတဲ့စားစရာတွေထဲမှာ ကြောင်အတွက် ဘာများပါလာပါလိမ့်လို့ အပြေးအလွားစဉ်းစားမိတော့ ကြောင်စားလို့ရမယ့် စားစရာ မပါလာ။

ဒီကြောင်က အခြားကြောင်တွေလိုလဲမဟုတ်တော့ သူ့အတွက် သီးသန့် ချက်ကျွေးမှဖြစ်မှာမို့ အိမ်ရောက်ရောက်ခြင်း မီးဖိုထဲ ပြေးပြီး ကြောင်စာ ချက်ရတော့မှာသေချာပါသည်…

ဒီကွန်ဒိုတိုက်ခန်းကြီးမှာ အထပ်ပေါင်းများစွာ အခန်းပေါင်းများစွာရှိပေမယ့် ဂရုတစိုက် အစာကျွေးမယ့်သူ စောင့်ရှောက်မယ့်သူ မရှိတာကြောင့် ဒီကြောင်အိုမကြီးက အမွေးအတောင်တွေ ကအစ ခြောက်ခြောက်ကပ်ကပ် ဖြူဆုပ်ဆုပ် လမ်းလျှောက်တိုင်းလဲ အားပြတ်ပြီး ယိုင်နဲ့နဲ့ ဖြစ်နေရုံမက အစာကျွေးသည့်တိုင်အောင် မြန်ရည်ရှက်ရည်စားဖို့ သွားတစ်ချောင်းမှ မရှိတော့ပါ။

ဒီကြောင်အတွက် စားစရာတာဝန်ယူထားရသူက အခန်းပေါင်းများစွာရှိသော ဒီကွန်ဒိုကြီးမှာ ကျွန်မတို့အခန်းက ကျွန်မသူငယ်ချင်းတစ်ယောက်ရယ် ကျွန်မရယ် နှစ်ယောက်သာရှိပါသည်။

ကျွန်မသူငယ်ချင်းကတော့ တိရိစ္ဆာန်ချစ်သည့်နေရာမှာ ကျွန်မထက် လေးစားစရာ အားကျစရာ ကောင်းလွန်းအောင် တော်လွန်းနေပြန်ပါသည်။ ဒီကြောင်အိုကြီးကို စပြီးသတိထားမိကတည်းက ကြောင်အတွက် သီးသန့် ငါးတွေဝယ်ပီးရေခဲသေတ္တဲာမှာ ထည့်ထားတတ်ပြီး ကြောင်အော်သံကြားတိုင်း ငါးကို ပြုတ်ပြီး ကျွေးလေ့ရှိတာမို့ အခုဆို ကြောင်အိုကြီးက သုံးထပ်ကို တကူးတက တက်လာပြီး ကျွန်မတို့အခန်းရှေ့မှာ လာအော်နေတတ်ပီ။

သူ့ကို ဂရုတစိုက်နဲ့ အစာကျွေးနေကျမို့ ဒီအခန်းကို ကြောင်အိုကြီးက မှတ်မိနေတာ မဆန်းလှသော်လဲ သူအင်မတန်ဆာလောင်နေချိန်မှာတော့ လှေကားထစ်တွေကနေပြီး ခြေလှမ်းယိုင်နဲ့နဲ့တွေနဲ့ သုံးထပ်ကို တက်လာတတ်တဲ့ သူ့ကိုတွေ့တိုင်း ကျွန်မတို့ စိတ်မကောင်းဖြစ်ရပြန်ပါသည်။

ဒီတိုင်းပြည်မှာ ရှိရှိသမျှသော ကြောင်တွေအားလုံး ကံဆိုးလွန်းတာကို တစတစ သတိထားမိခဲ့ပေမယ့် အဖြေရယ်လို့ တိတိကျကျတော့ရှာလို့မရခဲ့ပါ။ တကယ်ဆို ကြောင်လေးတွေဆိုတာ အိမ်မွေးတိရိစ္ဆာန်တွေထဲမှာမှ အခွင့်ထူးခံလေးတွေ လို့ကျွန်မမေမေက မကြာခဏပြောဘူးပါသည်။

ကျွန်မတို့တိုင်းပြည်က ကြောင်တွေကတော့ ဒီကကြောင်တွေထက် ကံကောင်းနေပါသေးသည်။ ကျွန်မတို့ တိုင်းပြည်မှာ ဆင်းရဲ ချမ်းသာမရွေး ကိုယ်မွေးထားတဲ့ကြောင်တွေကို အချိန်တန်ရင် ပုဇွန်ခြောက်ထောင်းပြီး ထမင်းနယ်ကျွေးမည့်သူကမရှားပါ။

ဒီ့ထက်ပိုလို့တတ်နိုင်ပါက ပဲကြီးလှော်နှင့်ခပ်ဆင်ဆင်တူသော ကြောင်အတွက် သီးသန့် ထုတ်လုပ်ထားသည့် သားရေစာများကို ဈေးကြီးပေးဝယ်ပြီး ကျွေးကြပါသေးသည်။ အိမ်မှာ အလှမွေးသောကြောင်များကိုလဲ နှစ်စဉ်နှစ်တိုင်း ဆေးခန်းပို့ပြီး ကာကွယ်ဆေးထိုးပေးရုံမက နာမကျန်းဖြစ်ရင်လဲ တိရိစ္ဆာန်ဆရာဝန်က အိမ်တိုင်ယာရောက် ဆေးလာထိုးပေးသည်အထိ ဘုန်းကံကြီးမားသော ကြောင်များလဲ ရှိပါသေးသည်။

ကြောင်တစ်ကောင်ကို အစပြုပြီး ချစ်ခင်ယုယ အကြင်နာပိုလွန်းသော ကြောင်တို့၏ သခင်မလေးများနှင့် တိရိစ္တာန်ဆရာဝန်တို့ ရွှေလက်တွဲသွားကြသော ဇာတ်လမ်းများလဲ ကျွန်မတို့တိုင်းပြည်တွင် မရိုးနိုင်အောင်ကြားဘူးခဲ့ပါသည်။

ကျွန်မ၏ အစ်မကြီးပင်လျှင် သူမွေးထားသောကြောင်မလေးအတွက် မကြာခဏ မျက်ရည်လည်ရွဲဖြစ်ပြီး နေ့မရွေးညမရွေး ဆေးခန်းပြေးနေခဲ့ဘူးပါသည်။ ပိစိဆိုတဲ့ သူ့ကြောင်မသေးသေးလေး ကလေးမွေးသည့်ညက ကြောင်မီးနေစောင့် မမကြီးတစ်ယောက် တစ်ညလုံးမအိပ်ရပဲ ကြောင်လက်သည်ပါ ဖြစ်ခဲ့ဘူးပါသည်။ မမကြီး သည်းသည်းလှုပ်ပုံမှာတော့ ပြောစမှတ်ပြုပါသည်။

အကောင်သေးသေးကြောင်မလေးက ကလေးမမွေးနိုင်တာမို့ ပြူတစ်တစ်နဲ့ ထွက်လာတဲ့ ကြောင်ပေါက်စလေးတွေကို မမကြီးကိုယ်တိုင် လက်နဲ့ဆွဲထုတ်ပေးခဲ့ရပါသည်။ ကြောင်မလေးက ကလေးတွေ ထွက်မလာမချင်း နာကျင်စွာနဲ့ အော်ဟစ်နေချိန်မှာ မမကြီးကလဲ မျက်ရည်တွေ ပေါက်ပေါက်ကျလို့ ကြောင်မလေးကို အားပေးနေခဲ့ပါသေးသည်။

ဆေးခန်းတွေပိတ်ချိန်မှာ ကလေးမွေးမိတာမို့ ကြောင်မလေး ပိစိဆေးရုံတက်ချိန်မရလိုက်ပါ။ ဆေးခန်းဖွင့်ချိန်ဆိုရင်တော့ မမကြီးက ဆရာဝန်ကို ပြေးခေါ်ဖို့ ဝန်မလေးတာမို့ ကြောင်အိုဂျီနဲ့ ကလေးမွေးရမှာတော့ သေချာလှပါသည်။

အင်မတန့်အင်မတန် ကြင်နာတတ်သော သနားတတ်သော စာနာတတ်သော သခင်များနှင့်သာ ကြီးပြင်းခဲ့ကြသော ကျွန်မတို့ အချစ်တော် ကြောင်လေးများမှာ အလွန်ကံကောင်းကြပါသည်။
ထိုသို့ ကြောင်အခွင့်အရေး အပြည့်အဝ ရခဲ့သော ကျွန်မတို့တိုင်းပြည်မှကြောင်များနှင့်သာ ရင်းနှီးကျွမ်းဝင်ခဲ့သော ကျွန်မ ဒီမြို့ကကြောင်တွေကို စတင်ပြီး တွေ့မြင်ရချိန်မှာတော့ အမည်မဖော်နိုင်သော ခံစားမှုတစ်ရပ်ဖြင့် တုန်လှုပ် ခြောက်ချားခဲ့ဘူးပါသည်။

ဒီမြို့လေးကိုရောက်ပြီး သုံးရက်မြောက်နေ့မှာ အလုပ်ကပြန်လာကာစ မြေညီထပ်ရှိ အဆောင်ဟောခန်းမကြီးတွင် အဝင်အထွက် လက်မှတ်ထိုးနေချိန်တွင် အဆောင်ဆင်ဝင်ဝဆီမှ ကြောင်အော်သံကြားမိတာမို့ မနေနိုင်မထိုင်နိုင် ထွက်ကြည့်မိတော့ အစာတောင်းနေသော ကြောင်နှစ်ကောင် အသံကုန်ဟစ်ပြီး အော်နေတာကို တွေ့လိုက်ရပါသည်။ ဘေးပတ်ဝန်းကျင်က လူများကလဲ ဥဒဟို သွားလာလျက် အသွားအလာမပျက် ကြောင်အော်သံကိုလဲ ဂရုမထားကြသလို ကြောင်တွေကိုလဲ အလေးမထားကြပါ။

တိုက်တိုက်ဆိုင်ဆိုင် ကျွန်မကျောပိုးအိတ်ထဲမှာ နို့ပေါင်မုန့် အချို့ရှိနေတာမို့ သတိတရနဲ့ ကြောင်နှစ်ကောင်ကို ထုတ်ကျွေးနေစဉ်မှာပဲ အဆောင်တာဝန်ကျ လုံခြုံရေးဝန်ထမ်းက ရောက်လာပြီး ကျွန်မကို နှင်ထုတ်ပါတော့သည်။ ဆင်ဝင်အောက်မှာ အမှိုက် မဖွပါနဲ့ဆိုတဲ့ ခပ်ဆတ်ဆတ် သတိပေးသံနဲ့အတူ ကြောင်နှစ်ကောင်ကို မောင်းထုတ်ပြီး ကျွန်မရဲ့ ပေါင်မုန့်တွေကိုပါ ပြန်ရှင်းလင်းသွားပါလို့ အမိန့်ပေးလာပါသည်။

ရုတ်တရက် လူအများရှေ့မှာ အပြောခံလိုက်ရတာမို့ တာဝန်ကျ လုံခြုံရေးဝန်ထမ်းကို နားမလည်နိုင်စွာနဲ့ တစ်ချက်ကြည့်ပြီး ပေါင်မုန့်များကို ကောက်ယူကာ မလှမ်းမကမ်းရှိ တိုက်နှစ်တိုက်ကြား ကားပါကင်ဆီလှမ်းထွက်လာမိပါသည်။ လူသွားလူလာရှင်းသော ကားပါကင်ဆီရောက်မှ ကြောင်နှစ်ကောင်ကို ပြန်ခေါ်ပြီး အစာကျွေးရပါသည်။ ကြောင်တွေအစာစားပြီး ပြန်သွားတော့မှ စားကြွင်းစားကျန်များကို စနစ်တကျ ရှင်းလင်းပြီး ကျွန်မအခန်းသို့ ပြန်ခဲ့ရပါသည်။

နေရာသစ်မှာ ကြုံတွေ့လိုက်ရသော လူနေမှုစရိုက် အသစ်စက်စက်မှာ ပျော်ဝင်ဖို့ကြိုးစားရင်း မတူညီသော ဓလေ့ထုံးစံအသစ်ကို လက်မခံချင်ပဲ လက်ခံလိုက်ရပါသည်။ ဒါလားဟဲ့ နိုင်ငံခြား ဒါလားဟဲ့ လူ့အခွင့်အရေး တိရိစ္ဆာန်အခွင့်အရေးလို့ ခပ်တိုးတိုးရွတ်ဆိုရင်း ကြောင်နှစ်ကောင်ပေးသော သင်ခန်းစာနှင့် စာနာသနားလွယ်သော ကျွန်မ၏ ပင်ကိုစရိုက်ကို ပထမဆုံးအကြိမ်အဖြစ် စိတ်ပျက်မိခဲ့သော နေ့တစ်နေ့လဲ ဖြစ်ခဲ့ပါသည်။

ကျွန်မအဆောင်မှ မပြောင်းမချင်း လူတွေ့တိုင်း တညောင်ညောင်အော်ကာ အစာတောင်းတတ်သော ကြောင်တွေကိုတွေ့တိုင်း အစာကျွေးဖြစ်ခဲ့ပါသည်။ တစ်ခါ အအော်ခံရဘူးသော အတွေ့အကြုံကြောင့် လူနေတိုက်ကြီးများအောက်တွင် လူမြင်သူမြင်ခံပြီး အစာမကျွေးရဲတော့ပါ။ ကြောင်အစာကျွေးတိုင်း လူသူလေးပါး ကင်းရှင်းသော နေရာများဖြစ်သည့် လူနေတိုက်တာများမဟုတ်သော တိုက်ဘေး လမ်းကြား ကားပါကင်စတဲ့နေရာတွေမှာ သတင်းစာစက္ကူစခင်းပြီး အစာကျွေးရပါသည်။

ကျွန်မရဲ့အလုပ်ကလဲ အဆောင်နားမှာ ရှိရှိသမျှသော ကြောင်တွေကိုအစာကျွေးသည့် အလုပ်တစ်ခုတည်းမဟုတ်တော့ပဲ ကြောင်တွေအစာ စားမစားစောင့်ကြည့်ရင်း နောက်ဆုံး စာကြွင်းစားကျန်တွေကိုပါ ရှင်းလင်းသုတ်သင်ရတဲ့ အလုပ်တစ်ခုပါ ပိုလာခဲ့ပါသည်။

ကျွန်မကြောင်တွေကို အစာကျွေးသည့်အခါတိုင်းလဲ ပတ်ဝန်းကျင်မှ ဖြတ်သွားဖြတ်လာကြသော လူအချို့က မသိမသာ ငဲ့စောင်းကြည့်သွားကြပါသည်။ ဖြတ်သွားဖြတ်လာများမှ ကျွန်မကိုကြည့်ပြီး အလုပ်မရှိ ကြောင်ရေချိုးဆိုတဲ့ စကားပုံကို မသိမသာ ရွတ်ဆိုချင်ရွတ်ဆိုသွားပါလိမ့်မည်။

ကျွန်မကတော့ ကျွန်မလုပ်နိုင်သော အလုပ်တစ်ခုကို လုပ်သင့်လုပ်ထိုက်သော အချိန်တွင် လုပ်ခဲ့ခြင်းလို့ပဲ ခံယူထားခဲ့ပါသည်။ နှမ်းတစ်ပွင့်နဲ့ ဆီမဖြစ်နိုင်တာကို သိခဲ့သော်ငြား နေ့စဉ် နေ့တိုင်း နှမ်းတစ်ပွင့်တည်းမှ ဖြစ်လာသော ဆီစက်သေးသေးလေးကို လျော့ကျမသွားရအောင် ကြိုးစားပြီးထိန်းသိမ်းခဲ့ဘူးပါသည်။
အဆောင်မှာနေစဉ်က ပိန်ပိန်လိမ်လိမ် ပုပုကွကွ ပျိုပျို အိုအို ကြောင်ပေါင်းစုံနှင့်ရင်းနှီးခဲ့သလို အဆောင်မှရွေ့ပြီး တိုက်ခန်းငှားနေမိချိန်မှာလဲ ကြောင်အိုကြီးတစ်ကောင်နှင့် ထပ်ဆုံရပြန်ပါသည်။

အိမ်ပြောင်းစကာလမှာတော့ ပတ်ဝန်းကျင်မှာ တိရိစ္ဆာန်တစ်ကောင်တလေမှ မတွေ့မိတာမို့ ရုတ်တရက် စိတ်ချမ်းသာသွားမိပါသည်။ ကျွန်မအတွက်တော့ တိရိစ္ဆာများ၏ ဒုက္ခကို မမြင်လို မတွေ့လိုတာထက် မမြင်ရဲ မမြင်ရက်တာက ပိုမှန်ပါလိမ့်မည်။

ကျွန်မ ဒီနိုင်ငံမှာ နေထိုင်စဉ်ကာအအတွင်း အိမ်မွေးတိရိစ္ဆာန်ှများအနက် အိမ်မွေးခွေးတစ်ကောင်စ နှစ်ကောင်စကိုသာ ဖြတ်သွားဖြတ်လာ မြင်ဘူးခြင်းဖြစ်ပြီး လမ်းမပေါ်မှာတော့ လမ်းဘေးခွေးတစ်ကောင်မှ မတွေ့ခဲ့မိပါ။ (ကျွန်မရဲ့ သတ်မှတ်ချက်အရ) လမ်းဘေးကြောင်များကိုသာ လမ်းပေါ်မှာ မကြာခဏ တွေ့ရတတ်ပါသည်။

ဒီတိုင်းပြည်က ခွေးများကြောင်များ ရရှိထားသော အခွင့်အရေးကတော့ ကျွန်မတို့တိုင်းပြည်က ခွေးများကြောင်များ ရရှိထားသော အခွင့်အရေးနှင့် ပြောင်းပြန်အချိုးကျနေခဲ့ပါသည်။ မြန်မာပြည်မှာ လမ်းဘေးကြောင်မရှိ လမ်းဘေးခွေးသာရှိ၏။ ဒီတိုင်းပြည်မှာတော့ လမ်းဘေးခွေးမရှိ လမ်းဘေးကြောင်သာရှိ၏။ ဟုတစ်ယောက်တည်း မှတ်ချက်ချနေမိပါသည်။

မြန်မာပြည်မှ ညစ်ညမ်းစကားတစ်ခွန်းဖြစ်သော ခွေးသူတောင်းစားဆိုသော စကားတစ်ခွန်းနေရာကို ဒီတိုင်းပြည်တွင်တော့ ကြောင်သူတောင်းစား ဆိုသော စကားလုံးဖြင့် အစားထိုးကြည့်လိုက်မိပါသည်။
ကျွန်မအိမ်ရှိကြောင်မကြီးက အဆောင်နားမှာ တွေ့ခဲ့ဘူးသော ကြောင်များထက် အဖြစ်ဆိုးလှပါသည်။ ကြောင်အဆင်းသဏ္ဍန်ကအစ သိသိသာသာ ကွာခြားလှပါသည်။ ကြောင်အိုမကြီးကတော့ ဆင်းရဲခြင်း ငတ်မွတ်ခြင်းဒဏ်ကို အလူးအလဲခံစားထားရသော လက္ခဏာများနှင့် အတိပြီးနေခဲ့ပါသည်။

အမွေးအတောင်များမှာ ဖြူရော်နေခဲ့သလို အရေပြားများကလဲ နံရိုးများကိုပင်ထိုးဖောက်မြင်နေရအောင် ပါးလျလျ။ ခြေလှမ်းတစ်လှမ်းခြင်းစီကို ယိုင်နဲ့နဲ့ လှမ်းနေရတဲ့ ကြောင်မကြီးမှာ အစာကျွေးလို့မှ မြိန်ရည်ရှက်ရည်စားဖို့ သွားတစ်ချောင်းမှမရှိ။

နဂိုငတ်မွတ်မှုကို အစာကောင်းကောင်းမဝါးနိုင်သော အာဟာရ ချို့တဲ့မှုကို ပေါင်းထည့်လိုက်တော့ အိုမင်းမစွမ်းတဲ့ ကြောင်အိုမကြီးအတွက် ဆုတ်ကပ်ဆိုက်နေသည်နှင့်မခြား။
ပထမဆုံးအကြိမ် ကြောင်အိုမကြီးနှင့် စတင်ဆုံးဆည်းတဲ့နေ့ကတော့ ကြောင်စာကျွေးနေကျ ကျွန်မအတွက် ထီပေါက်သလိုခံစားခဲ့ရပါသည်။

ကြောင်မကြီးက ကျွန်မဆီမှာ အစာလာတောင်းနေတာကြောင့် အလုပ်ကပြန်ချိန်မှာ တိုက်တိုက်ဆိုင်ဆိုင် ဝယ်လာမိတဲ့ KFC ကကြက်ကြော်တစ်တုံးကို ဆွဲထုတ်ပြီး ဝမ်းသာအားရကျွေးမိချိန်မှာမှ ကျွန်မအတွက် ငိုရအခက်ရယ်ရအခက် ပြဿနာကို စပြီး တွေ့လိုက်ရပါသည်။

ကျွန်မချကျွေးသော ကြက်ကြော်ကို ကြောင်မကြီးက ပါးစပ်ဖြင့် တွန်းကာ တို့ကာစားဖို့ကြိုးစားရှာပါသည်။ သို့သော် ကိုက်စရာ သွားကတစ်ချောင်းမှ မရှိတာမို့ ကြက်ကြော်နှင့် ကြောင်အိုမကြီး အပြန်အလှန်လွန်ဆွဲသလို တိုက်ပွဲဖြစ်နေရှာပါသည်။ သူ့အခက်အခဲကို ရိပ်မိတာမို့ ကြက်သားတုံးကို တစစီ ဖဲ့ပေးဖို့ လှမ်းဆွဲပြန်တော့ ကြောင်မကြီးက အဆွဲမခံ ကျွန်မကို ပြန်ပြီး ရန်လုပ်ပါသည်။ နောက်ဆုံးတော့ စိတ်မသက်မသာနဲ့ ကြောင်မကြီးကို ကြက်ကြော်နှင့် နှစ်ပါးသွား ကခိုင်းခဲ့ရပါတော့သည်။

နောက်နေ့တွေမှာတော့ အခွင့်ထူးခံ သူ့အတွက် ငါးတွေ ဝယ်ပြီး နူးနေအောင် ပြုတ်ရပါတော့သည်။ ငါးပြုတ်ကို ထမင်း နည်းနည်းနဲ့ ပျော့ပြဲနေအောင်နယ်ပြီး သွားမပေါက်သေးသော ကလေးကို ကျွေးသလို ကျွေးရပါတော့သည်။ ဒီနိုင်ငံရောက်မှ သင်ယူခဲ့တဲ့ သင်ခန်းစာလေးတွေကြောင့် နိုင်ငံကြီးသားပီသစွာပဲ အစာလဲကျွေး စောင့်ကြည့် ပြီးသန့်ရှင်းရေးလဲလုပ် ဒါနကုသိုလ်မျိုးစုံကို တပြိုင်တည်း ယူရပါတော့သည်။

တခါတရံ စာနာစိတ်အရင်းခံပြီး ကြောင်တွေကို အစာကျွေးတိုင်း ကျွန်မဘဝမှာ စွဲထင်နေခဲ့သော အရိပ်အချို့ကို ပြန်မြင်ယောင်လာတတ်ပါသည်။ လွမ်းဆွတ်စာ တမ်းတစွာ မြင်ယောင်မိတဲ့ အရိပ်တွေကတော့ ကျွတ်မထက်ပိုလို့ တိရိစ္ဆာန်တွေကို ချစ်ခင်တွယ်တာတတ်သော အဘိုးပဲဖြစ်ပါသည်။ အဘိုးကိုတော့ ကျွန်မတို့ မြေးတွေအကုန်လုံးက ပါပါကြီးလို့ ခေါ်ကြပါသည်။

အိမ်မှာ မွေးထားသောကြောင်များနှင့် တစ်ကောင်တည်းသောခွေးကို အစာကျွေးတဲ့ အလုပ်ကို ပါပါကြီးက တစ်ဦးတည်း တာဝန်ယူခဲ့ပါသည်။ ကျွန်မတို့ ငယ်စဉ်ကလဲ နေ့လည်စာ ညစာတွေကို ပါပါကြီးကိုယ်တိုင် တယုတယ ခွံ့ကျွေးလေ့ရှိပါသည်။ ထမင်းစားချိန်တွေမှာတော့ ထမင်းအုပ်ကြီးထဲမှာ ထမင်းရော ဟင်းပါ နယ်ထည့်ထားပြီး မြေးတွေအားလုံးကို စက်ဝိုင်းပုံစံ ထိုင်စေပြီး ပါပါကြီးက အလည်မှာ ထိုင်ကာ မြေးများကို အလှည့်ကျ ခွံ့ကျွေးလေ့ရှိပါသည်။

မြေးအားလုံးကို နေ့စဉ်နှင့်အမျှ ထမင်းခွံ့ကျွေးသော အလေ့အထမှာ ထမင်းဟင်း အလေအလွင့် မရှိစေရေးသက်သက်တော့ မဟုတ်လောက်ပါ။ ပါပါကြီး၏ မြေးများအပေါ်ထားရှိသော မေတ္တာစေတနာများက ထမင်းစားပွဲပေါ်မှာ ပြန့်ကျဲနေမည့် ထမင်းလုံး ဟင်းစက်များနှင့်လဲ လားလားမှ မဆိုင်ခဲ့ပါ။

ကျွန်မတို့ အားလုံးထမင်းစားပြီးချိန်မှာတော့ ပါပါကြီးက ထမင်းဇလုံကြီးထဲကို ထမင်းနှင့် ငါးပြုတ်များထည့်ကာ နှံ့စပ်အောင် နယ်ပါသည်။ တခါတရံ စိတ်တိုင်းမကျမချင်း ဆား အချိုမှုန့်များထည့်ကာ ထပ်ကာထပ်ကာ မြည်းကြည့်ပါသည်။ စိတ်တိုင်းကျပြီဆိုရင်တော့ သူ့အချစ်တော် ကြောင်များနှင့် တစ်ကောင်တည်းသော ခွေးကို ခေါ်ပြီး ထမင်းကျွေးပါတော့သည်။

ထမင်းကျွေးခါနီးတိုင်းလဲ ခွေးနှင့် ကြောင်များ အစာစားသော ခွက် ရေသောက်သောခွက်များကို စနစ်တကျ ဆေးကြောတတ်ပါသေးသည်။ ကျွန်မတို့ မွေးထားသောခွေးမှာ မျိုးရိုးကောင်းသော အိမ်မွေးအလှခွေး မဟုတ်ခဲ့ပါ။ ညအချိန်တွင် လှေကားထစ်တွင် အိပ်သော မသင်္ကာစရာမြင်လျှင် လှမ်းဟောင်တတ်သော သာမန် လမ်းဘေးခွေးသာ ဖြစ်ပါသည်။

သို့သော် ပါပါကြီးက အိမ်မှာမွေးထားသော ကြောင်များ ခွေးများကို အိမ်ရှိလူများနှင့် တန်းတူ သဘောထားပြီး ကျွေးမွေးခဲ့ပါသည်။ ခွေးစာနယ်တိုင်း ဂရုတစိုက် မြည်းတတ်သော အဘိုးကို မြေးများက နှာခေါင်းတရှုံ့ရှုံ့ဖြင့် စပ်စုတိုင်းလည်း ခွေးဆိုတာ လူလိုပဲ လျှာရှိတယ် အရသာခံတတ်တယ် အကောင်းမှပဲ စားချင်မှာပေါ့ မင်းတို့တောင် အကောင်းကြိုက်တတ်သေးတာ ခွေးလဲ ကြိုက်မှာပေါ့ ။

လူမစားတဲ့ အရိုးအရင်း စားကြွင်းစားကျန်တွေ ငါက မကျွေးချင်ဘူးဆိုတဲ့ အဘိုးကို သတိရမိတိုင်း ရှားပါးစွာ တွေ့ရခဲတဲ့ အဘိုးရဲ့ စေတနာတွေကို လေးစားလို့မဆုံးခဲ့ပါ။

ကြောင်အိုမကြီးအတွက် ငါးပြုတ်တိုင်းလဲ အိမ်က လျှပ်စစ်မီးဖိုလေးပေါ်မှာ နေ့နေ့ညည မပြတ်ရအောင် တည်ထားတတ်တဲ့ ခွေးစာကြောင်စာ ငါးပြုတ်အိုးကြီးကို အခါမလပ် သတိရနေမိပါသည်။
အိမ်မွေးတိရိစ္ဆာန်တွေကို သူထမင်းမစားမီ ဦးဦးဖျားဖျား ထမင်းနယ်ကျွေးလေ့ရှိသော စားကြွင်းစားကျန်ကျွေးလေ့မရှိသော ပါပါကြီး၏ မေတ္တာ စေတနာတွေကို ကျွန်မကိုယ်တိုင်လဲ လိုက်မမီခဲ့သလို ပါပါကြီးကဲ့သို့ စိတ်ထားမြင့်မြတ်သော လူမျိုးကိုလဲ အပြင်လောကမှာ အခုချိန်ထိ မတွေ့မိသေးပါ။

ပါပါကြီး ကွယ်လွန်သွားပြီးသည့်နောက်ပိုင်းမှာတော့ လျှပ်စစ်မီးဖိုပေါ်က ငါးပြုတ်အိုးကြီးလဲ တစတစ ပျောက်ကွယ်သွားခဲ့ပါသည်။ သူ၏ချစ်လှစွာသော အိမ်မွေးတိရိစ္ဆာန်များလည်း ထိုနည်းလည်းကောင်းပင် တစစီ တစစီ ပျောက်ကွယ်သွားခဲ့ပါသည်။

လူကြီးသူမများပြောစကားအရ လူမမာ ရှိသောအိမ် နာရေးဖြစ်နေသောအိမ်တွင် ကြောင်သတ္တဝါများနေလေ့မရှိ ကြောင်များတွင် အလိုလို သိနေသော အာရုံခံစားမှုကြောင့် ထိုအိမ်များမှ ဝေးရာသို့ ထွက်ပြေးနေလေ့ရှိသည် ဆိုတဲ့ စကားကတော့ ကျွန်မတို့ အိမ်အတွက် မဟုတ်ခဲ့ပါ။

ပါပါကြီး ကွယ်လွန်ချိန်တွင် ပါပါကြီးချစ်လှစွာသော ကြောင်မလေးက ဗီရိုအမြင့်တနေရာမှနေ၍ ပါပါကြီးကို မမှိတ်မသုံ စိုက်ကြည့်နေခဲ့ပါသည်။ သူ့ကိုချစ်သော သခင်ကို ပစ်၍ အဝေးသို့ မပြေးခဲ့ပါ။ သူ၏ ချစ်လှစွာသော ခွေးလေးကလဲ သူ့သခင်ကွယ်လွန်ပြီး လ အနည်းငယ်အကြာတွင် သခင့်အပေါ်လွမ်းစိတ်ဖြင့် ကောက်ကာငင်ကာ ကွယ်လွန်သွားခဲ့ပါသည်။

ပါပါကြီး ကွယ်လွန်ချိန်မှစ၍ လမ်းပ်ါတွင် လေလွင့်နေသော ခွေးများ ကြောင်များကိုမြင်တိုင်း နာနာကျင်ကျင် ခံစားရပါသည်။ ပါပါကြီး၏မျက်နှာကို ပြေးမြင်မိပါသည်။

သတ္တဝါ တို့အပေါ် မေတ္တာပေး၍ မေတ္တာရခဲ့သော အကြင်နာပေး၍ အကြင်နာရခဲ့သော ပါပါကြီး၏ စေတနာတရားနှင့် နှိုင်းယှဉ်တုပ၍ မီနိုင်လောက်သော စေတနာ မေတ္တာမျိုးကို ကျွန်မ ငတ်မွတ်နေခဲ့သည်မှာ ဆယ်စုနှစ် တစ်ခု ကျော်လွန်ခဲ့ပြီဖြစ်ပါသည်။ တိတိကျကျ ဆိုရပါမူ ဆယ့်ငါးနှစ်တိတိ ကြာခဲ့ပါပြီ။

အခု ကျွန်မမြင်နေတွေ့နေရသော ကြောင်အိုမကြီးကို ပါပါကြီးတွေ့ခဲ့လျှင် ဆေးခန်းပို့ပြီး ဂလူးကို့စ်သွင်းပေးမလား ထမင်းကို ညက်နေအောင်ဝါးပြီး သေသေချာချာ ခွံ့ကျွေးနေမလား… နွားနို့ကျိုပြီး အချိန်ဇယားနဲ့ တိတိကျကျ တိုက်နေလေမလား …. သေချာတာကတော့ ကျွန်မထက် အဆပေါင်းများစွာ ကြင်နာယုယစွာ စောင့်ရှောက်မှုပေးနိုင်ပါလိမ့်မည်။

သတ္တဝါများအပေါ်ထားရှိသော ပါပါကြီးရဲ့ မေတ္တာက အရာအားလုံးထက် အဆပေါင်းများစွာ သာလွန်ခဲ့သည်ပဲလေ။

ပါပါကြီးထံမှာ ကျွန်မရယူနိုင်ခဲ့သော တစ်ခုတစ်သော အမွေကတော့ သတ္တဝါတို့အပေါ်ထားရှိအပ်သော စာနာစိတ်နှင့် ဂရုဏာတရား သာဖြစ်ပါသည်။

သင်ဆရာ မြင်ဆရာ ကြားဆရာ ဆရာ ဆိုတဲ့စကားလုံးတွေထက် ကန့်ကူလက်လှည့် ငယ်ဆရာ ဆိုတဲ့ အဆိုလေးကို ရင်းရင်းနှီးနှီး စပြီးကြားဖူးခဲ့တာ အဖေ့ဆီက ဖြစ်ပါသည်။

အဖေက ကဗျာဆန်သလို တခါတရံ စကားပြောရင်လဲ စာသံပေသံတွေနဲ့ နောက်တီးနောက်တောက် ပြောတတ်သူတစ်ယောက်မို့ အဖေနဲ့စကားပြောရင် ဘယ်တုန်းကမှ မပျင်းရပါ။

အိမ်မှာ သားသမီးတွေ ပညာရေး အတွက် အမြဲစိတ်မအေးနိုင်တဲ့ သူကအဖေပါ။ ကျွန်မမောင်နှမတွေအားလုံး အင်္ဂလိပ်စာကို အဖေ့ရှေ့မှာ ဘယ်သူမှ အသံထွက်ပြီး မဖတ်ရဲကြ။ တစ်ယောက်ယောက်က ယောင်ယမ်းပြီး စာလုံးတစ်လုံးလောက် အော်ဖတ်လိုက်လို့ကတော့ အဖေ့အတွက် သင်စရာ အကွက်ရသွားသလို အော်ဖတ်လိုက်တဲ့သူကလဲ အဖေ့စိတ်တိုင်းကျ အသံမထွက်မချင်း ထပ်ခါတလဲလဲ ဆိုနေရတတ်ပါသည်။ အဖေ့စိတ်ကြိုက် အသံမထွက်လာပါက မရမချင်း အအော်ခံရတတ်ပါသည်။

နောက်ဆုံးတော့ ကျွန်မတို့ မောင်နှမတွေ အားလုံး ဘွဲ့အသီးသီးရသည်အထိ အဖေ့ရှေ့မှာ အင်္ဂလိပ်စာကို အသံထွက်ပြီး မဖတ်ရဲခဲ့ကြပါ။ အဖေကိုယ်တိုင်က ဆယ်တန်းအထိသာ ကျောင်းတက်ခဲ့ပီး ဘွဲ့မရခဲ့ပါ။ ဒါပေမယ့် အဖေ ငယ်စဉ်ကတည်းက တက်လာခဲ့တဲ့ကျောင်းတွေက အင်္ဂလိပ်သာသနာပြုကျောင်းတွေ ဖြစ်တာမို့ အင်္ဂလိပ်စကားပြောတဲ့ ဆရာတွေနဲ့ စနစ်တကျ သင်ခဲ့တဲ့အဖေက သားသမီးတွေရဲ့ အင်္ဂလိပ်အသံထွက်တွေကို ဘယ်တုန်းကမှ စိတ်တိုင်းမကျခဲ့ပါ။

ပြီးတော့ သားသမီးတွေ လက်ရေးမလှမှာကိုလဲ အဖေက စိတ်ပူတတ်ပါသေးသည်။ အဖေရော အမေပါ လက်ရေးလက်သား သေသပ်လှပအောင် ရေးနိုင်ကြပါသည်။ သားသမီးတွေ အားလုံးကိုလဲ လက်ရေးလှလှလေးတွေ ရေးနိုင်ဖို့ အဖေကိုယ်တိုင် တဖွဖွ မှာနေခဲ့သလို ကျွန်မတို့ စာရေးတဲ့ ခဲတံတွေအားလုံးကိုလဲ အဖေကိုယ်တိုင် ချွန်ပေးခဲ့ဘူးပါသည်။

အခုချိန်ထိ အလုပ်ထဲမှာ ခဲချွန်စက်နဲ့ ခဲတံချွန်တိုင်းလဲ ဓါးပါးပါးလေးနဲ့ အဖေချွန်ပေးခဲ့တဲ့ မချွန်မတုံး ခဲတံလေးတွေကို ကျွန်မ သတိရနေခဲ့ပါသည်။

ကျွန်မတို့မောင်နှမတွေထဲမှာတော့ လက်ရေးမလှတဲ့သူက တချိန်လုံးမျက်နှာ ငယ်ရပါတော့သည်။ ကျွန်မ မှတ်မိသလောက် အကိုကြီးရဲ့ လက်ရေးက ပဲပင်ပေါက်လို ရှည်မျောမျော ထိုးထိုးထောင်ထောင် အဖေက အကိုကြီးရဲ့ လက်ရေးကို ဘယ်တုန်းကမှ စိတ်တိုင်းမကျခဲ့။ ဘုန်းကြီးကျောင်းသား လက်ရေးလို့ ထောပနာပြုတတ်သလို အခွင့်ရတိုင်းလဲ လက်ရေးမလှတဲ့အကြောင်းကို ပြောလို့မဆုံးခဲ့ပါ။

အကိုကြီးလဲ သူ့လက်ရေးပဲပင်ပေါက်တွေကို မကြာခဏ ခလုတ်တိုက်ခံနေရတာမို့ ဘွဲ့ရခါနီးမှ လက်ရေးလှစာအုပ်ဝယ်ပီး အင်္ဂလိပ်စာရော မြန်မာစာပါ ပြန်ရေးရပါတော့သည်။

(အလုပ်ထဲမှာ ဘယ်လိုမှ ကြိုးစားပြီး ဖတ်လို့မရတဲ့ နိုင်ငံတကာက လက်ရေးလက်သားတွေ တွေ့တိုင်း ဘွဲ့ရခါနီးမှ ဝလုံးပြန်ရေးနေတဲ့ အကိုကြီးကို သတိရမိပါသည်။ )

အဖေ့ကျေးဇူးကြောင့် အခုတော့ ကျွန်မအကိုကြီးရဲ့ ပဲပင်ပေါက် လက်ရေးထိုးထိုးထောင်ထောင်တွေက ဝိုင်းဝိုင်းစက်စက် လှလှပပ ဖြစ်လာခဲ့ပါသည်။ ကျွန်မဆီကိုစာလာလို့ အကိုကြီးရဲ့ လက်ရေးဝိုင်းဝိုင်းလေးတွေ မြင်ရတိုင်လဲ အဖေနဲ့ အကိုကြီးရဲ့ လက်ရေးလှ စစ်ပွဲကို ပြန်မြင်ယောင်ပြီး ခဏခဏ ပြုံးမိပါသည်။

ကျွန်မကိုယ်တိုင်လဲ အဖေနဲ့လဲ မကြာခဏ ပြဿနာတက်ခဲ့ဘူးပါသည်။ အဓိက တက်တဲ့ပြဿနာတွေက ကျွန်မဖတ်တဲ့ စာအုပ်တွေက စပါသည်။ ကျွန်မက တွေ့သမျှ မြင်သမျှ စာအုပ်ကို ဖတ်လေ့ရှိသူ။ မျက်စိရှေ့တွေ့သမျှ အချစ်ဝတ္တု သိုင်းဝတ္တုကစလို့ မဂ္ဂဇင်း ဂျာနယ် အတ္ထုပတ္တိ သမိုင်း ရာဇဝင် မှန်သမျှ အသည်းအသန် ဖတ်တတ်သူ။ စာမှန်ရင် ကောင်းကောင်းဆိုးဆိုး မဝေဖန်ပဲ တွေ့သမျှကို မလွတ်တမ်းဖတ်ခဲ့ပါသည်။

အဖေကတော့ ကျွန်မလိုမဟုတ်ပါ။ ကျွန်မ စာအုပ်ဖတ်နေချိန်မှာ ဘာစာအုပ်တွေလဲလို့ စပ်စပ်စုစုမေးမြန်းတတ်ပီး သူမကြိုက်တဲ့ အချစ်ဝတ္တုဖတ်နေရင်လဲ ပွစိပွစိ ပြောလို့မဆုံးတော့ပါ။ အပျော်ဖတ် အချစ်ဝတ္တုတွေဖတ်တာကို အဖေက အားမပေးခဲ့ပါ။ နာမည်ကျော် စာရေးဆရာမတွေရဲ့ အချစ်ဝတ္တုတွေ ဖတ်မိတိုင်းလဲ အဖေနဲ့ ခဏခဏ စကားများခဲ့ရပါသည်။

“အဲလို အရည်မရ အဖတ်မရစာတွေဖတ်လို့ ဘာအကျိုးရှိမှာလဲ နောင်တချိန် ညည်းစာရေးရင် ဘယ်လိုစာတွေရေးမှာလဲ” လို့ မဆီမဆိုင်မေးတတ်ပါသေးသည်။ အဲဒီချိန်တုန်းကတော့ ကျွန်မစာရေးဖို့ စိတ်ကူး စိုးစဉ်းမျှ မရှိခဲ့ပါ ။ဒါပေမယ့် တချိန်ချိန်မှာ ကျွန်မစာရေးဖြစ်လိမ့်မယ် ဆိုတာကိုတော့ အဖေက မှန်းဆမိနေခဲ့ပုံရပါသည်။

အဖေကိုယ်တိုင်ကလဲ စာဖတ်သူတစ်ယောက် အဖေစွဲစွဲမြဲမြဲ ဖတ်လေ့ရှိတဲ့စာအုပ်တွေက ရသစာပေတွေ။ ကာတွန်းစာအုပ်က စလို့ ရှိရှိသမျှ ဖတ်ဖွယ်ဖတ်ရာ စာအုပ်မှန်သမျှ သေသေချာချာ ရွေးပြီးဖတ်လေ့ရှိပါသည်။
ကာတွန်းတွေထဲမှာ အရိုင်းဇာတ်ကောင်ကို အဖေက အလွန်သဘောကျပါသည်။ မဂ္ဂဇင်းဆိုရင် အဖေ့အသည်းစွဲက စံပယ်ဦး မဂ္ဂဇင်း ။ တစ်ခါတုန်းက ရပ်ကွက်ထဲက စာအုပ်ဆိုင်က စာအုပ်ဟောင်းတွေ ရှင်းထုတ်တော့ စံပယ်ဦးစာအုပ်တွေ အကုန်လုံးနီးပါး အဖေကဝယ်လာခဲ့ဘူးပါသည်။

မစန္ဒာရဲ့ ဝတ္တုတိုတွေကိုလဲ အဖေက သဘောကျသည်။ မစန္ဒာရဲ့ ပုဇွန်ကြား ခုနစ်ကောင် ဝတ္တုတိုလေးကိုလဲ သတိရတိုင်း ပြန်ပြောပြတတ်ပါသည်။ တခါတရံ အိမ်မှာ ပုဇွန်ဟင်းချက်လို့ စကားစပ်မိတိုင်းလဲ စာအုပ်ကိုရှာပြီး ပုဇွန်ကျား ခုနစ်ကောင်ကို ပြန်ဖတ်ခိုင်းလေ့ရှိပါသည်။

ကျွန်မကိုလဲအခွင့်သင့်တိုင်း လမ်းကြုံတိုင်း သူကြိုက်တဲ့ ဝတ္တုတွေကို အသံထွက်ပြီး ဖတ်ပြခိုင်းတတ်ပါသည်။ကျွန်မ အလုပ်အားရက်တွေမှာတော့ အချိန်ရရင်ရသလို အဖေ့ကို စာအုပ်တွေ ဖတ်ပြခဲ့ဘူးပါသည်။

အဖေ့ရဲ့ အကြိုက် အခြားစာအုပ်တစ်အုပ်ကလဲ ဆရာချစ်စံဝင်းရဲ့ အမေနဲ့ အမေ့အကြောင်း စာအုပ်လေးပဲဖြစ်ပါသည်။ အဖေကြိုက်တဲ့စာအုပ်လေးကို ကျွန်မလဲကြိုက်နှစ်သက်တာမို့ အကြိမ်ပေါင်းများစွာ အဖေ့ကို ဖတ်ပြခဲ့ရပါသည်။ စာအုပ်ဖတ်ပြီးတိုင်းလဲ အဖေက သမီး အဲဒီစာအုပ်လေး မကောင်းဘူးလား ဘယ်နေရာမှာ ဘယ်သူက ဘယ်လိုပြောတာ ဆိုပြီး စမြုံ့ပြန်ပြီး ပြန်ပြောနေတတ်ပါသေးသည်။

အဖေက မကောင်းဘူးလားမေးတိုင်းလဲ ကျွန်မက ကောင်းတယ်လို့ တစ်ခါမှမပြောပဲ နှာခေါင်းပဲရှုံ့ပြခဲ့ဘူးပါသည်။ တကယ်တော့ အဖေ့ကို စချင် နောက်ချင်စိတ်နဲ့သာ နှာခေါင်းရှုံ့မိပေမယ့် အဖေကြိုက်နှစ်သက်သော စာအုပ်များကို ကျွန်မလဲ နှစ်သက်ခဲ့ပါသည်။ အဖေစာဖတ်ခိုင်းချိန်တွေမှာ ကောင်းတယ်ပြောမိရင် ခဏခဏ ဖတ်ပြရမှာ သေချာတာမို့ တစ်ခါမှတော့ ကောင်းတယ်နော်လို့ မပြောဖြစ်ခဲ့ပါ။

ဆရာကြီး ဦးရန်အောင်ကို သူ့အမေက အမြဲမှာတတ်တဲ့စကားတစ်ခွန်းကိုလဲ အဖေက တချိန်လုံး တဖွဖွပြောနေတတ်ပါသေးသည်။ ဆရာကြီး အသက် ၆၀ ကျော်သည့်တိုင် “ဟဲ့ ငရံ ကားလမ်းဖြတ်ကူးရင် သေသေချာချာ ကူးနော် “လို့ မှာတတ်တဲ့ ဆရာဦးရန်အောင်ရဲ့ အမေအကြောင်းကတော့ ခဏခဏ ဖတ်ရလွန်းတာမို့ စာမျက်နှာတောင် အလွတ်ရလုရခင် ဖြစ်ခဲ့ပါသည်။

အဖေ့ရဲ့ အသည်းစွဲ စကားပြေတစ်ပုဒ်လဲရှိပါသေးသည်။ အဖေ့ရဲ့ အသည်းစွဲ ကျွန်မတို့မောင်နှမတွေရဲ့ အသည်းမစွဲတစွဲ စကားပြေကတော့ အထက်တန်း မြန်မာစာ သင်ရိုးဟောင်းထဲက မင်းတုန်းမင်းနှင့် ငါးခြောက်ပြား စကားပြေလေး ဖြစ်ပါသည်။
မင်းတုန်းမင်း ဖြစ်လာမယ့် မောင်လွင်ကို ငါးခြောက်ပြား သိမ်းခိုင်းတဲ့ မင်းဆရာတော် ဦးစန္ဒိမာရဲ့ ငါးရံ့ခြောက်နှစ်သက်ပုံနဲ့ မောင်လွင်ကို ကျောကွဲအောင် ကြိမ်လုံးနဲ့ရိုက်ပြီး ဆုံးမနေပုံကို မြင်ယောင်စေတဲ့ စကားပြေလေးက ကျွန်မ အလွတ်ရလုနီးပါး ဖတ်ပြခဲ့ရတဲ့ စကားပြေတစ်ပုဒ်လဲ ဖြစ်ပါသည်။

မင်းတုန်းမင်းနှင့် ငါးခြောက်ပြား စကားပြေကို ဖတ်ပြီးတိုင်းလဲ သမီးရေ ကံ့ကူလက်လှည့် ငယ်ဆရာဆိုတာ ဘယ်လိုကွဲ့ ဆရာတော်က မောင်လွင်ကို ဘာ့ကြောင့် ဘယ်လို ဆုံးမခဲ့သလဲ မောင်လွင်ရဲ့ မယ်တော်ကလဲ ဆရာတော်ကို ဘာ့ကြောင့် အပြစ်မမြင်ခဲ့တာလဲ ဆိုတဲ့ ရှင်းလင်းချက်ကိုလဲ စီကာပတ်ကုံး ရှင်းပြတတ်ပါသေးသည်။ (အခုတော့ မင်းတုန်းမင်းကြီး နိုင်ငံတော်ကို စနစ်တကျ အုပ်ချုပ်ခဲ့ပုံ စည်းစနစ် ကြီးခဲ့ပုံတွေကို မကြန်ရေးတဲ့စာအုပ်တွေထဲမှာ ထပ်မံမှတ်သားမိပြန်တော့ အဖေ့ကို ဖတ်ပြချင်စိတ်တွေ ပေါ်လာခဲ့ပြန်ပါတယ်။ ဒီတစ်ခေါက် အိမ်ပြန်ချိန်မှာ အဖေ့ကို ဖတ်ပြဖို့ စာအုပ်တစ်အုပ် တိုးခဲ့ပါပီ။)

ကျွန်မတို့ မောင်နှမတွေထဲမှာ မင်းတုန်းမင်းနဲ့ ငါးခြောက်ပြားကို မဖတ်ဘူးတဲ့သူ မရှိသလောက် အဖေ့လက်ထဲမှာ အဲဒီ စကားပြေ စာအုပ်တွေ့ရင်လဲ မောင်နှမတွေ အလျှိုလျှို ပျောက်သွားတတ်ကြပါသည်။ အကိုတွေအမတွေအားလုံးကတော့ အဖေ့ကို စာဖတ်ပြရမှာ ပျင်းကြပါသည်. စာဖတ်ဖို့ကိုလဲ စိတ်မဝင်စားကြပါ။

နောက်ဆုံးမှာတော့ အဖေ့အတွက် ပင်တိုင် စာဖတ်ပြဖို့တာဝန်ကျလာသူက ကျွန်မတစ်ယောက်တည်း ကျန်ပါတော့သည်။ စိတ်ပါသည်ဖြစ်စေ မပါသည်ဖြစ်စေ အဖေခိုင်းတိုင်း မရိုးနိုင်တဲ့စာအုပ်တွေကို ဖတ်ပြရလွန်းတော့ ကျွန်မလဲ အဖေကြိုက်တဲ့စာအုပ်တွေကို ကြိုက်တတ်လာခဲ့ပါသည်။

အဖေကျွန်မတို့ကို စာဖတ်ခိုင်းရခြင်းရဲ့ ရည်ရွယ်ချက်ကိုလဲ ရိပ်မိလာခဲ့ပါသည်။ အဖေကိုယ်တိုင် စာဖတ်နိုင်သူတစ်ယောက် ဖြစ်တာမို့ စာဖတ်ရမှာ ပျင်းသူတစ်ယောက်မဟုတ်ခဲ့ပါ။ စာဖတ်ရမှာ ပျင်းရုံသက်သက်နဲ့တော့ သားသမီးတွေကို တကူးတက ခိုင်းနေမှာ မဟုတ်တာတော့သေချာပါသည်။ ကျွန်မတို့မောင်နှမတွေကို ရသစာပေတွေနဲ့ ရင်းနှီးလာအောင် မိတ်ဆက်ပေးရုံသက်သက် စာကောင်းပေကောင်းတွေ ရွေးဖတ်တတ်အောင် သင်ယူပေးခြင်းသက်သက်လဲ ဖြစ်နိုင်ပါသည်။

အဖေဖတ်ခိုင်းတတ်သော အဖေဖတ်လေ့ရှိသော စာအုပ်များအားလုံးသည် အပျော်ဖတ်စာပေများမဟုတ်ပဲ အသိပညာ ဗဟုသုတနှင့် ရသပေးနိုင်သော စာအုပ်များသာဖြစ်ခဲ့ပါသည်။ စာဖတ်ခြင်းအမွေကိုတော့ အဖေ့ဆီကပင် အပြည့်အဝရခဲ့ပါသည်။

စာဖတ်သူပီပီ အဖေက ပုံတိုပတ်စ ဟာသတိုတိုထွာထွာများကိုလဲ ပြောတတ်ပါသေးသည်။ တခါက အညာသူအညာသားများ ကပ်စေးနည်းတဲ့ အကြောင်းပြောမိတော့ အဖေက အညာသားရေနစ်တဲ့ပုံပြင်လေးကို ပြောပြခဲ့ဘူးပါသည်။

အညာသားတစ်ယောက်ရေနစ်နေချိန်မှာ သွားကယ်မိတဲ့သူက “ဟေ့လူ လက်ပေး” လို့ လှမ်းပြောတော့ အညာသားက လက်ကို မကမ်းပဲ ပေပြီးတော့နေတယ် တဲ့။ နောက်မှ ကယ်တဲ့သူက သူကယ်နေတာက အညာသားဆိုတာ သတိရသွားပြီး “ဟေ့လူ ဒီမှာ ကျုပ်လက်ကို လှမ်းယူလိုက်” ဆိုမှ အညာသားက လက်ကို လှမ်းဆွဲတယ်လို့ ပြောပြဘူးပါတယ်။

အညာသားတွေများ ရေနစ်ပီး သေခါနီးဆဲဆဲမှာတောင် ပေးဆိုတဲ့စကားလုံးထက် ယူပါဆိုတဲ့စကားလုံးကိုသာ လက်ခံချင်ကြတာ အာဂ ကပ်စေးနည်းတွေလို့ အားရပါးရပြောတတ်တဲ့ အဖေက အခုတော့ အညာသူ ချွေးမတစ်ယောက်ရလို့ ချွေးမကိုလဲ အခွင့်ရတိုင်း အညာသားရေနစ်တဲ့ပုံပြင်ပြောပြပြီး ကျီစယ်နေတတ်ပါသည်။ (အညာသားစစ်စစ်များဖြစ်သော ကိုရေတမာနဲ့ ကိုနေစိုးနိုင်ကို မရည်ရွယ်ပါ။ တိုက်ဆိုင်မှုရှိလျှင် ခွင့်လွတ်ပါ။)

ကျွန်မအတွက်တော့ အဖေ ပြောပြောနေခဲ့သော ကံ့ကူလက်လှည့် ငယ်ဆရာသည် အဖေကိုယ်တိုင်လဲ ဖြစ်ခဲ့ပါသည်။

ကျွန်မစာရေးဖို့ စဉ်းစားတိုင်း ဒီလိုစာမျိုးရေးရင် အဖေလက်ခံနိုင်ပါ့မလား။ ကျွန်မရေးတဲ့စာဟာ သုတစာပေ ဖြစ်မလား ရသစာပေဖြစ်မလား အပျော်ဖတ် သက်သက် စာပေဖြစ်နေမလား ဆိုတဲ့ အတွေးတွေက ကျွန်မကို အချိန်တိုင်းလဲ နှိပ်စက်နေခဲ့ဘူးပါသည်။ လူငယ်ပီပီ လူငယ်လက်ခံနိုင်မယ့် ပေါ့ပေါ့ပါးပါး စာလေးတွေ ရေးဖို့ကြိုးစားတိုင်းလဲ အဖေကြိုက်တဲ့စာမျိုး မဟုတ်ဘူးနဲ့တူပါရဲ့လို့ ပြန်သုံးသပ်မိပြီး ဆက်မရေးဖြစ်တဲ့ စာတွေလဲ ရှိခဲ့ဘူးပါသည်။

ကျွန်မရဲ့စာတွေထဲမှာ ဘဝပေးရသတွေ တော်တော်များများ ပါနေတာကတော့ အဖေ့ဆီကရခဲ့တဲ့ စာဖတ်ခြင်း အမွေကြောင့်ပဲ ဖြစ်နိုင်ပါသည်။ စာရေးတဲ့သက်တမ်း သိပ်မကြာလှသေးပေမယ့် စာရေးတိုင်း အဖေ့ကို မြင်ယောင်ပြီး ရေးဖြစ်ခဲ့ပါသည်။

ဒါပေမယ့် အခုလို ကျွန်မ စာရေးနေချိန်မှာတော့ ကျွန်မရေးတဲ့ စာတွေကို အဖေဖတ်လို့မရနိုင်တော့ပါ။ ဆီးချိုရောဂါရဲ့ နောက်ဆက်တွဲကြောင့် အဖေ့မျက်လုံးအခြေအနေက စာဖတ်ဖို့(လုံးဝ)အခွင့်အရေးမပေးတော့ပါ။ အရာဝတ္တုတွေကိုလဲ သဲသဲကွဲကွဲ မမြင်ရတော့ပါ။

အစပိုင်းမှာတော့ အဖေက သားသမီးတွေ စိတ်မကောင်းဖြစ်မှာစိုးတာကြောင့် မျက်လုံးတွေ မမြင်ရတာကိုလဲ ဖွင့်မပြောပဲ တီဗီရှေ့မှာ ထိုင်ပြီး ဟန်ဆောင်ပန်ဆောင်နဲ့ တီဗီကြည့်ပြတတ်ပါသည်။ ခပ်တည်တည်နဲ့ ကားမောင်းပြီး မြေးတွေကို မူကြိုပို့ပြပါသေးသည်။ ဒါပေမယ့် အမေ့ကိုတင်ပြီး စက်ဘီးစီးခဲ့တဲ့ တစ်ရက်မှာတော့ စက်ဘီးမှောက်ပြီး အဖေရော အမေပါ နဖူးကွဲ ဒူးပြဲမှ အဖေ့မျက်လုံးတွေ ကောင်းကောင်းမမြင်ရတာကို ကျွန်မတို့သိရခွင့်ပါသည်။

ကျွန်မအဝေးရောက်နေချိန်မှာတော့ အဖေ့ကို စာဖတ်ပြမယ့်သူ မရှိတာမို့ အဖေလဲ ရေဒီယိုနဲ့ တီဗီကိုသာ အဖော်ပြုနေရမှာသေချာပါသည်။ တခါတရံမှာတော့ အမေက ကျွန်မကိုယ်စား အဖေ့ကို စာဖတ်ပြကောင်း ဖတ်ပြနေပါလိမ့်မည်။

ကျွန်မကတော့ အဖေ့ဆီက ရခဲ့ဘူးတဲ့ အသိတရားတစ်ခု အထိန်းအကွပ်တစ်ခုနဲ့ စာတွေရေးဖြစ်ခဲ့ပါသည်။ တခါတရံမှာတော့ သုတ ရသ တစ်ခုခု မပေးနိုင်ပဲ ဘယ်လိုစာမျိုးကိုမှ မရေးတော့ဘူးလို့လဲ ဆုံးဖြတ်မိတာတာမို့ နှင်းနဲ့မာယာ တစ်ယောက် ခုနောက်ပိုင်းမှာ စာရေးကြဲနေခဲ့ပါသည်။ ဒါပေမယ့် အချိန်ရရင် ရသလို စာရေးဖြစ်နေမှာတော့ သေချာပါသည်။
အဖေကလဲ ကျွန်မစာရေးတာကို အားပေးနေမှာ သေချာပါသည်။

ဒီပို့စ်လေးကိုတော့ ကျွန်မရဲ့ ကံ့ကူလက်လှည့် အဖေဖတ်ဖို့ အမှတ်တရ ရေးခြင်းဖြစ်ပါသည်။

တခါတရံမှာ မြန်မာပီသချင်တာမို့ ခေါင်းလျှော်ရမယ့်ရက်ကို တွေးမိတော့ ကိုယ့်မွးနေ့ရယ် သောကြာရယ်ကိုနှုတ်ပြီးရင် ရက်သတ္တတစ်ပတ်မှာ ခေါင်းလျှော်ဖို့ ငါးရက်တိတိကျန်တယ်
ဒီကြားထဲမှာမှ ဗုဒ္ဓဟူးနေ့မှာခေါင်းလျှော်ရင် ၄၅ ရက်တိတိ လာဘ်ပိတ်တယ်ဆိုတော့ တပတ်မှာ ခေါင်းလျှော်လို့ရတာက ၄ ရက်တိတိကျန်နေတယ်…

ရေချိုးခေါင်းလျှော်ခါနီးတိုင်း ရက်လွတ်ရဲ့လားလို့ စဉ်းစားရတဲ့ ဝဋ်ဒုက္ခက မြန်မာ မိန်းကလေးတွေကို တော်တော်လေး နှိပ်စက်ခဲ့ဘူးတယ်ထင်ပါရဲ့..…

တခါတလေ ဆံပင်တွေက စေးကပ်နေပြီ ရက်ကမလွတ်ပေမယ့် ဖြစ်ချင်ရာဖြစ်ဆိုပြီး ခေါင်းလျှော် အခန့်မသင့်တော့ နှာစေး ချောင်းဆိုး…တုတ်ကွေးမိ..
အစွဲအလန်းကြီးတာ နေရာတိုင်းမှာ မကောင်းဘူးလို့ အသိတရားနဲ့ဆင်ခြင်။
အဲလို ဆင်ခြင်နေတဲ့ကြားက ပြီးခဲ့တဲ့နှစ်လလောက်က ရသင့်ရထိုက်တဲ့ ဘောနပ်စ်မရခဲ့တာ
ဗုဒ္ဓဟူးနေ့မှာ ခေါင်းလျှော်မိလို့များလား လို့ မြန်မာပီပီ အူကြောင်ကြောင် တွေးမိသေး....…

မြန်မာ မဟုတ်တဲ့ သူငယ်ချင်းတွေကတာ့ ခေါင်းကို လျှော်ချင်တဲ့နေ့လျှော် နေ့တိုင်းလျှော် နေ့ရော ညပါ လျှော် …သူတို့ကျတော့လဲ ဘာမှ အစွဲမရှိလေတော့ လုပ်တိုင်းဖြစ်…

နောက်ထပ်သိခွင့်ရတဲ့ ပညတ်ချက်ကလဲ ကိုယ့်မိသားစုဝင်တစ်ယောက်ယောက် ခရီးသွားနေရင် ပြန်မလာမချင်း ခေါင်းမလျှော်ရဘူး ဆိုပဲ…ဒါဆို မိသားစုထဲမှာ ခရီးသွားနေတဲ့သူရှိရင် ခေါင်းမလျှော်ပဲ ဘယ်နှစ်ရက်နေရမှာလဲ တပတ်လား ၁၀ ရက်လား ခရီးသွားတဲ့သူက တစ်လလောက်ကြာမယ်ဆိုရင် ကိစ္စက ပြတ်ရော…

ဒါ့ကြောင့်ထင်ပါရဲ့ နောက်ထပ် ထပ်ကွန့်ထားတဲ့ ခေတ်မီမီ ပညတ်လေးက ခရီးသွားနေတဲ့သူ လမ်းခုလတ်မှာရှိနေချိန်လေးပဲ ခေါင်းမလျှော်ရဘူးဆိုပဲ ( ခရီးသွားသူက လေယာဉ်ပေါ်မှာ ကားပေါ်မှာ ရထားပေါ်မှာ သင်္ဘောပေါ်မှာ ရောက်နေတဲ့အချိန်ပေါ့…)

မြန်မာပြည်က မီးနေသည်တွေရဲ့ ဒုက္ခကလဲ မသေးလှပါ မီးမထွက်မချင်း ၇ ရက်တိတိ ရေမချိုးရ ၄၅ ရက်တိတိ ဆပ်ပြာမကိုင်ရ….(တချို့ကျတော့ ၄၅ ရက်တိတိ ခေါင်းမလျှော်ရတဲ့)
ဖျားနာနေရင် ၂ ရက် ၃ ရက်လောက် ရေမချိုးပဲနေရမတဲ့…

မြန်မာလူမျိုးတွေ တကိုယ်ရေ သန့်ရှင်းမှုကို မကြည့်ပဲ ရှေးထုံးအစဉ်အလာကိုပဲကြည့်နေခဲ့တာ ဟိုးပဝေသဏီကတည်းကဆိုပဲ..…

ဒီက မြန်မာလူမျိုးမဟုတ်တဲ့ သူငယ်ချင်းတစ်ယောက် သူ့အတွေ့အကြုံလေးကိုပြောပြတာက မီးဖွားပြီးပြီးချင်း တစ်နာရီအတွင်းမှာ ခေါင်းလျှော် ရေချိုးခဲ့တယ် နေ့တိုင်း ရေချိုးတယ် ဘာမှမဖြစ်ပါဆိုပဲ…..

ပြီးတော့ စီးပွားရေးလုပ်နေတဲ့သူတွေက ဗေဒင်ဆရာရဲ့ အစီအမံအရ နာရေးဖြစ်နေတဲ့ အိမ်တို့ မီးနေသည်အိမ်တို့ လုံးဝ(လုံးဝ) မသွားကြဘူးဆိုပဲ….(သူတို့ အိမ်မှာ နာရေးဖြစ်ခဲ့ရင် ဆွေမျိုးသားချင်းထဲက မီးဖွားခဲ့ရင် ဘယ်လိုလုပ်ကြသလဲတော့ မသိ….)

ကိုယ့်ရဲ့ဦးလေးအရင်းကြီးကလဲ အဲလိုအယူသည်းခဲ့တာဆိုတော့ လူမှုရေး ဖြစ်တဲ့ သာရေးနာရေး မီးနေသည်ကိစ္စ အဒေါ်လုပ်သူကပဲ ရှေ့ဆုံးက ကြွရတယ်လေ……

တင်္နလာနေ့မှာ အရေးကြီးတဲ့ ကိစ္စတွေလုပ်ရင် ၂ခါပြန်လုပ်ရတတ်တယ်ဆိုတာ တခါတလေမှာတော့ တိုက်ဆိုင်မှု အနေနဲ့ သတိပြုမိပါတယ်… အမြဲတော့ မဖြစ်နိုင်ပါ (အမြဲတမ်းမှန်နေမယ်ဆိုရင်တော့ မြန်မာပြည်က အစိုးရရုံးပိတ်ရက်တွေထဲမှာ တင်္နလာနေ့ပါ ပေါင်းထည့်ရမယ် ထင်ပါရဲ့….)

ကိုယ့်ထက် အစွဲအလမ်းကြီးတဲ့ မြန်မာတွေကို နေရာတိုင်းမှာ တွေ့နေရတာမို့ တင်္နလာနေ့ကိစ္စကို တခါတရံမှာ ဆွေးနွေးမိပါတယ်…ဒါပေမယ့် လက်ခံနိုင်လောက်တဲ့ ယုတ္တိရှိတဲ့ အဖြေကိုတော့ မရခဲ့ပါ….

တလောလေးကပဲ အရေးကြီးတဲ့ အလုပ်ကိစ္စအတွက် အဖြေစောင့်နေတုန်းမှာ မိတ်ဆွေတစ်ယောက် ကလေးမွေးတော့ ဆေးရုံမှာသွားကြည့်သင့် မသွားသင့်ဆိုတာကြီးကို တော်တော်စဉ်းစားလိုက်ရတယ် ( မြန်မာ လူမျိုးဆိုတော့လဲ ရှေးစကားတွေကို မသိစိတ်နဲ့ စွဲနေတော့ အစွဲတွေကို ချွတ်ရတာ ခက်တော့ ခက်သား)…

သွားချင်တာကလဲ ထိန်းမနိုင်သိမ်းမရ ဖြစ်နေတာနဲ့ ဖြစ်ချင်ရာဖြစ် ကံပဲဟ ဆိုပြီး ဆေးရုံသွား မီးနေသည်အတွက် ဆေးရုံက ကျွေးတဲ့ ထမင်းကိုကပ်စားပြီး ဆေးရုံမှာ တော်ကီတွေပွားခဲ့တာ မိုချုပ်တဲ့အထိ….

ပြီးလဲပြီးရော အလုပ်ကိစ္စ အတွက် တစ်ပတ်နဲ့ ရမယ့် အဖြေက တစ်ပတ်နဲ့လဲမရ ၁၀ ရက်နဲ့လဲမရ နှစ်ပတ်နေတဲ့အထိလဲ မရတော့ သွားပြန်ပီဟ မြန်မာလူကြီးတွေ ပြောတာ နားမထောင်မိလို့ဆိုပြီး ဝမ်းနည်းပက်လက်နဲ့ နောင်တက အရင်ရမိသေး… …

ဒါပေမယ့်လဲ အဲဒီအစွဲတွေ ကျွတ်ချိန်တန်လို့လားမသိ စောင့်နေမိတဲ့ ကိစ္စက နှစ်ပတ်ကျော်မှ အဆင်ပြေလေတော့ ရှေးသုံးတွေ ရှေးစကားတွေအတွက် တွေးရခက်ကြီး ဖြစ်နေပြန်ပါတယ်….

ငါမြန်မာလူမျိုး ဒါပေမယ့် ငါနေတာ မြန်မာပြည်မဟုတ် ချွတ်သင့်တဲ့ အစွဲလေးလဲ ချွတ်အုံးမှလို့ ကိုယ့်ကိုယ်ကို ဆုံးမလို့ တော်တော်လေး နေသာထိုင်သာ ရှိသွားခဲ့ပါတယ်…

မြန်မာဆန်တာဟာ နေရာတိုင်းမှာ မကောင်းဘူးဆိုတာတော့ နိုင်ငံခြားရောက်မြန်မာတိုင်းက အပြည့်အဝလက်ခံမယ်ထင်ပါရဲ့…..(ဒီနေရာမှာတော့ ရှေးရိုးစွဲ အယူဝါဒတွေကိုသာ ပြောချင်တာပါ အခြားသော လူနေမှုစရိုက်တွေကို ပြောခြင်းမဟုတ်ပါ… အတွေးအခေါ် အယူအဆတွေကိုသာ ဆိုလိုခြင်းဖြစ်ပါသည်)..

ဗေဒင်နဲ့ ယတြာတွေကိုလဲ မယုံပါလို့ မပြောလိုပါ ကမ္ဘာက လက်ခံထားတဲ့ ယုတ္တိရှိသော လက်ခံသင့်သော နက္ခတ်ဗေဒင် အချို့ကိုတော့ စိတ်ဝင်စားမိပါတယ်…. ယတြာပိုင်းမှာလဲ နည်းပညာအရ လက်မခံနိုင်လောက်အောင် အစွမ်းထက်တာတွေ မြင်ဖူးနေခဲ့တော့လဲ အပြည့်အဝမဟုတ်တောင် မယုံပါလို့ တထစ်ချ မပြောလိုပါ…
ကိုယ်တိုင်ကတော့ ယခုချိန်ထိ လုံးဝ( လုံးဝ) ယတြာမချေခဲ့ဘူးပါ။။

ဗေဒင်တော့ ၂ ခါလောက် တွက်ဖူးတယ်ထင်ပါရဲ့… ( တစ်ခါကတော့ တော်တော် မှန်တဲ့ဗေဒင်ကိုတွေ့ခဲ့ဘူးတယ်… နာမည်ကျော် ဗေဒင်ဆရာမဟုတ်သော တက္ကသိုလ်ကျောင်းသူ သူငယ်ချင်းတစ်ယောက်က လမ်းကြုံလို့ ဟောပေးခဲ့တာပါ…းးး)))))

ဈေးသုံးမလွယ်နဲ့ဆိုတာကတော့ တော်တော်လေး မှန်တာမို့ အပြည့်အဝ လက်ခံကျင့်သုံးပါတယ်….
ဈေးသုံးလွယ်ရင် မွဲမှာ သေချာတယ်လေ….

ရှေးထုံးကတော့ ခေတ် ကာလ ဒေသ ပရောဂကိုလိုက်လို့ သေသေချာချာ ခွဲခြမ်းစိတ်ဖြာ ဖြစ်ပါတယ်…အရင်ကထက်တော့ အစွဲတွေ လျှော့သွားသလိုလိုပါပဲ…..

အခြားအခြားသော ရိုးရာ အစွဲများနှင့် တိုက်ဆိုင်မှုများလဲ ရှိပါသေးသည်… တိုက်ဆိုင်မှုရှိခဲ့ရင် ရေးမိမယ်ထင်ပါသည်…
ဒီပို့စ်လေးနဲ့ပက်သက်လို့ လွတ်လပ်စွာ သဘောထားကွဲလွဲနိုင်သလို လွတ်လပ်စွာ ထင်မြင်ယူဆစေချင်ပါသည်….

တကယ်လို့များ ကမ္ဘာကြီးပျက်ခဲ့မယ် ဆိုရင်ပေါ့ ( မပျက်ဘူးဆိုတာကိုတော့ ၁၀၀ % ယုံကြည်နေပါတယ်)

ဒီကိစ္စက ခုတလော လူပြောများနေတဲ့ကိစ္စလေးလေ... ကိုယ်လဲခေတ်မီအောင်လို့ ခဏလောက်တော့ ကမ္ဘာပျက်ကြည့်မယ်နော်... ( ကိုအောင်သာငယ် က တက်ဂ်ထားတယ်ဆိုတော့လဲ စိတ်ကူးယဉ်ကြည့်တာပေါ့)

တကယ်မှာတော့ ကမ္ဘာကြီးပျက်မယ့်အရေးကို တွေးပြီရင်းပူနေမိတာ အမှန်ပါ။ ဒါပေမယ့် ကမ္ဘာ မပျက်ခင် အကြောင်းအမျိုးမျိုးကြောင့် ကိုယ်သေဆုံးခဲ့ရင်တော့ ကမ္ဘာပျက်တာကိုတောင် မြင်ခွင့်သိခွင့်ရမှာ မဟုတ်ပါဘူး… ကွေးသောလက် မဆန့်ခင် ဆိုတာလေးကို အမြဲစဉ်းစားနေမိတယ်။ အတွေ့အကြုံတစ်ခုအနေနဲ့ ကမ္ဘာပျက်တာကို မြင်ခွင့်ရမယ်ဆိုရင် ကိုယ်ဟာ ကုသိုလ်ထူးလို့ပေါ့။

၁။ဘယ်သူတွေနဲ့ရှိနေချင်ပါလိမ့်..
မိသားစုနဲ့ပေါ့ အထူးသဖြင့်တူလေးတွေအနားမှာ ရှိနေချင်တယ်..ဘာမှနားမလည်သေးတဲ့ ကလေးတွေ ကြောက်နေမှာစိုးတယ် ကလေးတွေကို မကြောက်အောင် အာရုံပြောင်းထားမယ်…
နောက်ဆုံးအချိန်ထိ ကလေးတွေနဲ့ ဆော့နေမယ်… မိဘတွေကို အားပေးနေမယ် အာရုံပြောင်းပေးဖို့ကြိုးစားမယ်…..

ကိုယ့်ကမ္ဘာမှာ ပထမက မိဘ ဒုတိယက သြချစ်ဘုန်းမိုရ်( အချစ်ဆုံးတူလေး)ပါ အဲဒီအတွက် သူငယ်ချင်းတွေက ကိုယ့်ကို မကြာခဏ စကားနာထိုးတတ်ကြတယ်… သားသြချစ်ကို အရမ်းချစ်လွန်းလို့တဲ့…
တတိယနေရာမှာတော့ လူတစ်ယောက်ရှိမယ်ထင်တယ်… (တတိယ တစ်ယောက်ကတော့ ကမ္ဘာပျက်မယ့်နေ့မှာ ကိုယ့်အနားမှာ နေချင်တဲ့ ဆန္ဒရှိမရှိ မသေချာသေးတာမို့ မေးကြည့်ရအုံးမယ်..)

၂။ဘာတွေခံစားနေရမလဲမသိဘူးနော်..
မိသားစုတွေ စုစုစည်းစည်းရှိနေမယ်ဆိုရင်တော့ နောက်ဆုံးအချိန်ထိ မိသားစုရဲ့ မေတ္တာ သံယောဇဉ်တွေကို ခံစားပြီး ပျော်ရွှင်နေမိမှာပါ။

မိသားစုဆိုတာက စိတ်နဲ့ စိတ်ဓါတ်တွေ ပေါင်းစုထားတဲ့နေရာလေ အဲဒီစိတ်ဓါတ်တွေကပဲ ကောင်းမွေ ဆိုးမွေတွေကို ခံစားပြီး နောက်ဆုံးအချိန်ထိ နားလည်မှုတွေနဲ့ ရင်ဆိုင်နိုင်တဲ့ သတ္တိကိုပေးမှာပါ။

သေရမှာမကြောက်သလို ဆုံးရှုံးမှုတွေအတွက်လဲ ဝမ်းနည်းနေမှာမဟုတ်ပါဘူး… လူတစ်ယောက်ဖြစ်နေတဲ့အတွက် နောက်ဆုံးနေ့ကို ရင်ဆိုင်ရမှာ ဓမ္မတာပါ အဲဒီအတွက် နောင်တတွေ ကြောက်စိတ်တွေ မရှိလောက်ပါဘူး။

၃။ပြင်ဆင်ထားချင်တာတွေကဒါလေးတွေပေါ့
အချိန်မီ မိသားစုဆီပြန်နိုင်ဖို့ လေယာဉ်လက်မှတ်တစ်စောင်
အဲဒီနေ့အတွက် ချစ်တဲ့ တူကလေးတွေအတွက် ချောကလက်တချို့ အိုဗာတင်း နဲ့ ကစားစရာတွေ မိဘတွေအတွက် ကော်ဖီတွေ…. မောင်နှမတွေအတွက် အအေးပုလင်းတွေ..

ပြီးတော့မိသားစုတစ်စုလုံးအတွက် လုံလောက်မယ့် အိပ်ဆေးတွေ (ဘယ်တော့မှ ပြန်မနိုးမယ့် အိပ်ဆေးတွေပေါ့)
ကမ္ဘာပေါ်က နောက်ဆုံးသတင်းတွေရဖို့အတွက် ရေဒီယိုတစ်လုံး ဒါမှမဟုတ် အင်တာနက်လိုင်းတစ်ခု....

ဒါမှ နောက်ဆုံးအချိန်ဆိုတာ သေချာပီဆိုရင် ကလေးတွေကို အိုဗာတင်းထဲမှာ အိပ်ဆေးထည့်တိုက် မိဘတွေကိုက အိပ်ဆေးတွေပါတဲ့ကော်ဖီ မောင်နှမတွေအတွက်လဲ အအေးပေါ့…..

သူတို့ကို ကြောက်ရွံ့ထိတ်လန့်ခြင်း ဝမ်းနည်းခြင်း ပူဆွေးသောကတွေမခံစားစေပဲ အသက်သာဆုံးနည်းနဲ့ လောကကြီးက ထွက်ခွာသွားစေချင်တဲ့ ဆန္ဒရှိပါတယ်…..
ကိုယ်တိုင်ကတော့ သူတို့အားလုံး မရှိတော့ဘူးဆိုတာသေချာမှ အဲဒီအိပ်ဆေးသောက်မယ်လို့ စဉ်းစားထားပါတယ် မိသားစုကို စိတ်မချဘူးလေ… ( မကိဆီမှာ ဆေးကြိုမှာထားရမယ်ထင်ပါရဲ့)

၎။ဝမ်းနည်းမိမှာလားဆိုတော့
ဝမ်းနည်းစရာတွေ မရှိစေဘို့ တင်နေတဲ့ မေတ္တာကြွေးတွေ သံယောဇဉ်ကြွေးတွေကို အခုကတည်းက ဆပ်ဖို့ကြိုးစားနေပါတယ်။ ကိုယ့်ကိုချစ်သော ကိုယ်ကချစ်သော လူသားအားလုံးအပေါ်မှာ အကောင်းဆုံးအရာတွေ ပေးထားခဲ့မှာပါ…
မေတ္တာငတ်နေတဲ့သူတွေကို မေတ္တာပေးခဲ့မယ် စိတ်ဓါတ်ခွန်အားလိုနေတဲ့သူတွေကို ခွန်အားဖြည့်ပေးခဲ့မယ်….

နောင်တနဲ့အတူ ဝမ်းနည်းနေရမယ့် အဖြစ်တွေက ဝေးအောင် အခုကတည်းက အကြွေးတွေ ဆပ်နေပါတယ်….
ဒီတော့ အဲဒီအချိန်မှာ ဝမ်းနည်းမိမှာ မဟုတ်ပါဘူး… သေချာပါတယ်……
(အခုတော့ သံယောဇဉ်ရပ်ဝန်းတစ်ခုကို သတိရနေမိတာမို့ သံယောဇဉ်ရပ်ဝန်းက လူတစ်ချို့ကို ရှာဖွေနေပါတယ် … ခက်တာက သူတို့က Face Book မှာလဲမရှိဘူး G-talk မှာလဲ မရှိကြဘူး အွန်လိုင်းကို လုံးဝမသုံးတဲ့လူတချို့ပေါ့)

၅။ကြောက်လန့်မိမယ်ထင်ပါသလား..
အင်း နောက်ဆုံးအချိန်အတွက် ကိုယ်လိုချင်တဲ့ အရာတွေရှိနေမယ်ဆိုရင် ကြောက်စရာမရှိလောက်ဘူးထင်ပါရဲ့…

၆။ကိုယ်နဲ့အတူ..ဆောင်ထားချင်တာ…ရှိနေချင်တာက..
လောကဓံကို သတ္တရှိရှိ ခံနိုင်မယ့် စိတ်ခွန်အား..( လူတစ်ချို့က အဲလိုအဖြစ်မျိုးနဲ့ ရင်ဆိုင် ကြုံတွေ့တဲ့အချိန်တွေမှာ သွေးပျက်သွားတတ်ကြတယ်လို့ ကြားဘူးထားလို့ပါ။ ကိုယ်ကိုယ်တိုင်လဲ ခံနိုင်ရည် အဆင့် ဘယ်လောက်အထိရှိမလဲ ဆိုတာ မှန်းဆလို့မရနိုင်ပါဘူး…)
ကမ္ဘာမီးလောင် သားကောင်ချနင်း ဆိုတဲ့စကားပုံအတိုင်း သားကောင်တွေချနင်းရဲဖို့ထက် ကိုယ်ကိုယ်တိုင် သားကောင်အဖြစ် အနင်းခံနိုင်ဖို့လဲ ခွန်အားအချို့ ရှိနေချင်ပါတယ်။

၇။ဘာတွေရေးမိမလဲမသိဘူးနော်..
အဲဒီအချိန်မှာတော့ ကဗျာတွေစာတွေထက် တူလေးတွေ ကို အာရုံပြောင်းပေးဖို့ ပုံတွေဆွဲပြနေချင်တယ်… ကလေးတွေအတွက် ဝလုံးတွေ ကူရေးပေးဖြစ်မယ်ထင်တယ်…..

ဂ။ဘာတွေများတွေးနေမိမလဲ
ကလေးတွေနဲ့ အလုပ်ရှုပ်နေခဲ့ရင်တော့ တောင်တာင်အီအီ တွေးနေဖို့ အချိန်မရလောက်ဘူးထင်ပါရဲ့။

၉။ဒီလိုအချိန်မှာ ဒီလို ဂုဏ်ယူချင်သေးတယ်
မိသားစုအတွက် ကိုယ့်ဘဝတစ်ခု ဖြစ်တည်ခဲ့ဘူးတယ်။
မိဘတွေအတွက် သိတတ်တဲ့ သမီးကောင်းတစ်ယောက် ဖြစ်ခဲ့တယ်…
မောင်နှမတွေအတွက် လိမ္မာတဲ့ ညီမတစ်ယောက် အဖြစ် ရှိခဲ့ဘူးတယ်.. သူငယ်ချင်းမိတ်ဆွေတွေအားလုံးအတွက် မိတ်ဆွေကောင်းတစ်ယောက် ဖြစ်ခဲ့ဘူးတယ်…..
ချစ်ခဲ့ဘူးတဲ့ လူတစ်ယောက်အတွက် ( တစ်ယောက်ထက်လဲ ပိုနိုင်ပါတယ်) တာဝန်ကျေတဲ့ လက်တွဲဖော်ဖြစ်ခဲ့ဘူးတယ်…
တူလေးတွေအတွက် သံယောဇဉ်ကြီးလွန်းတဲ့ အန်တီလေးတစ်ယောက် ဖြစ်ခဲ့ဘူးတယ် ..
ကိုယ့်ကို မုန်းတီးခဲ့တဲ့လူတွေအတွက်တော့ အမှတ်ရစရာ လူတစ်ယောက် ဖြစ်ခဲ့ဘူးတယ်..(လူချစ်ခံရတာ မဆန်းသလိုပဲလူမုန်းခံရတာလဲသိပ်မဆန်းပါဘူး)

၁၀။ ရှာကြံပြီးဖြေသိမ့်လိုက်ပါ့မယ်
အင်း…. လူပီသတဲ့လူတစ်ယောက် ဖြစ်ခဲ့တယ် ထင်ပါရဲ့……

(ကိုယ်နဲ့အတူ မြန်မာပြည်က သန်းပေါင်း ၆၀သော ပြည်သူတွေကို မျက်စိတွေနားတွေ ပိတ်ထားခဲ့တဲ့ အန်ကယ်ကြီးတွေလဲ သေတာပဲလေ… ခုချိန်မှာတော့ အာဏာတွေ ပါဝါတွေက ဒဏ္ဏာရီ ပုံပြင်လိုပါပဲလား…..)

အိုဘာမားနဲ့အတူ ဘဲလီဇဘက်ဘုရင်မကြီးနဲ့အတူ လေးစားအားကျရတဲ့ ဆရာမဂျူးနဲ့အတူတူ ဟောလီးဝုဒ် စတားတွေနဲ့အတူ တစ်ရက်တည်းသေခွင့်ရတာ နည်းတဲ့ကုသိုလ်လား…းးး))))

၁၁။ကျူးရင့်ချင်တဲ့ ဥဒါန်း
ကမ္ဘာဦးအစကိုမကြုံဘူးပေမယ့်ကမ္ဘာပျက်တာကိုတော့ကြုံဘူးတယ်….
နောက်ဆုံးကမ္ဘာက ကံထူးသူ သန်းပေါင်းခြောက်ထောင်မှာ ငါလဲ တစ်ယောက် အပါအဝင်ပေါ့……..
(ကြုံတောင့်ကြုံခဲ ဒီလိုအဖြစ်အပျက်တွေကို မျက်ဝါးထင်ထင်ကြုံတွေ့ရတာ ကုသိုလ်ထူးလွန်းလို့နော်…)

၁၂။ မှာချင်တဲ့မှာတမ်း…
တကယ်လို့များ ကိုယ်တို့အိပ်မောကျနေချိန်မှာ ကမ္ဘာမပျက်တော့ဘူး ( ဆူနာမီနဲ့မှားတာပါ..)ဆိုရင် ကိုယ့်ကို ပြန်နှိုးဖို့ မမေ့ကြပါနဲ့… ( မကိနဲ့တကွ ဘလော့မိတ်ဆွေများအားလုံးကို မှာချင်ပါတယ်)….
တခါတလေမှာ ကိုယ်တွေရထားတဲ့ သတင်းတွေက မှားတတ်တယ်လေ မြန်မာ့အသံလို တော့ မလုပ်နဲ့နော်…
ကမ္ဘာလောကကြီးက ဆန်းကြယ်တယ်လေ တခါတလေ ဘာမှမဟုတ်ပဲနဲ့ အံ့သြထိတ်လန့်စရာ အတွေ့အကြုံတွေကို ပေးတာကိုး...

ဒီတစ်ခါ အလှည့်ကျ တက်ဂ်ရမယ့်သူတွေကတော့

ဘလော့ဂါအသစ်စက်စက်လေး အညတြ
Singapore ITB ပွဲမှာ အလုပ်တွေရှုပ်နေတဲ့ ညီညီ(ပြည်)
အခန်းဖော်အကြာင်း တိတ်တိတ်လေးလာမေးနေတဲ့ ကိုရဲ
On the Way ရန်ကုန်- ဒူဘိုင်းလေယာဉ်ပေါ်မှာ ငိုက်နေတဲ့ လတ်လတ်ဇော်
အွန်လိုင်းမှာနော်ခမ်းကိုမျှော်နေတဲ့ မငုံ
သမီးကြီး အိန်ဂျယ် ကတော့ နှစ်ထပ်ကွန်း တက်ဂ်ခံရခြင်းပေါ့
ဂျပန်ပြည်က မိုမိဂျိ
ငြိမ်ချက်သားကောင်းနေတဲ့ ဇီဇဝါ
မမသီရိ
အပျင်းထူနေတဲ့ သမီးပျို
အသံတိတ်နေတဲ့ မယ်မဒီ
ချစ်သော အမရာ
အမရာရဲ့ အိုင်လွယ်ပန်
အကြာကြီးပျောက်နေတဲ့ ကိုသားကြီး
စာကျက်ချင်ယောင်ဆောင်နေတဲ့ ကိုကိုမောင်
ခုတလော ပေါ်မလာတဲ့ မိုးစက်အိမ်
ဓါးသွေးနေတဲ့ ကိုနေစိုးနိုင်
ဇာတ်ပွဲကန်ထရိုက်ကြီး ကိုမြစ်ကျိုးအင်း
တစ်နေ့တစ်ပုဒ် မရိုးရအောင် ပုံမှန်ရေးနေတဲ့ ကိုပီတာ
ခေတ္တရန်ကုန်ရောက် ကိုချမ်း
ကွန်ပျူတာဆေးရုံတင်ထားတယ်ဆိုတဲ့ ကိုကြယ်(လင်းကြယ်ဖြူ)
ကိုယုယ
မတက်ဂ်စဖူး တက်ရမယ့်ဘလော့ဂါက ကိုဖိုးစိန်
ဒေါက်တာလေး သက်တန့်ချို
ကော့သောင်းသားလေး
ဘလော့ဂါမဟုတ်တဲ့ အကိုတော် ဘရိုင်ရန်ဘုန်းနိုင် (သူက ဒီကိစ္စကို အသည်းအသန် စိတ်ဝင်စားနေတာ)

အဲတော့ ( ၂၆) ယောက်တိတိ အချိန်ရမယ်ဆိုရင် ချစ်တယ် ခင်တယ်ဆိုရင် ရေးပေးစေချင်ပါသေးတယ်...