အချစ်စစ်တို့မည်သည် လူသိရှင်ကြား ဖြစ်စရာမလို တရားဝင် ချစ်သူဖြစ်နေစရာမလို ဘယ်ကိုရောက်ရောက် ဘယ်လောက်ဝေးဝေး အငွေ့အသက်လေးနဲ့ အမှတ်တရ အတွေးလေးတွေနဲ့ ရင်ထဲမှာ တသသနဲ့ ချစ်နေခွင့် မြတ်နိုးနေခွင့် ရူးသွပ်နေခွင့် လွမ်းဆွတ်နေခွင့် ရှိပါသည်။

လူတစ်ယောက်ကို လူမသိသူမသိ တိတ်တခိုးချစ်နေရတာ....
သူရော ကိုယ်ပါသိပေမယ့် ချစ်နေပေမယ့် အကြောင်းအမျိုးမျိုးကြောင့် လူသိရှင်ကြား ချစ်သူဖြစ်ခွင့်မရတာ...
တခါတရံ ချစ်သူက လူသိရှင်ကြား ချစ်ပြချင်ပေမယ့် သူ့ဂုဏ်သိက္ခာ ကိုယ့်ဂုဏ်သိက္ခာတွေအတွက် ကိုယ့်အချစ်တွေကို တ်ိတ်တိတ်လေး သိမ်းဆည်းထားလိုက်ရတာ...

တိတ်တခိုးချစ်ရသူတွေအနေနဲ့ ဘယ်သူမှမသိအောင် တစ်ယောက်တည်း တိုးတိုးတိတ်တိတ် ခံစားနေရတဲ့ ဝေဒနာတွေက တခါတရံ ပူလောင်မှု နာကျင်မှု ကြေကွဲမှု မျက်ရည်တွေနဲ့ ပြည့်နှက်နေတတ်ပါတယ်။

ချစ်ခြင်းအတွက် လူအမျိုးမျိုးက အဓိပ္ပာယ် အမျိူးမျိုး ဖွင့်ဆိုကြပါတယ်။
အချစ်အတွက် ရယူလိုကြတယ်၊ ပိုင်ဆိုင်လိုကြတယ်၊ အချစ်အတွက် ဘဝတွေပျက်ကြတယ်၊ မျက်ရည်တွေကျကြ၊ ရန်တွေဖြစ်ကြတယ်။

အမျိုးမျိုးသော အတ္တတွေအကြား ပိုင်ဆိုင်ရယူလိုခြင်း အလျဉ်းမရှိ၊ အတ္တကင်း၊ ရမ္မက်ကင်းတဲ့ ပေးဆပ်ခြင်းသက်သက်နဲ့ ချစ်ခဲ့ကြတဲ့ ချစ်သူများ၊ လူမသိသူမသိ ချစ်ခဲ့ကြတဲ့ ချစ်သူများကို တခါတရံ ထူးဆန်းစွာ ရှားရှားပါးပါး တွေ့မြင်ရတတ်ပါတယ်။

ပေးဆပ်ခြင်းသက်သက်နဲ့ ရူးသွပ်စွာ၊ မိုက်မဲစွာ အချစ်ကို ကိုးကွယ်ယုံကြည်ကြသူတွေ အကြောင်း မြင်ရကြားရတိုင်း စာအုပ်တွေထဲမှာ ဖတ်ရတိုင်းလဲ ရင်ထဲမှာ ကြေကြေကွဲကွဲ နာနာကျင်ကျင် ခံစားရပါတယ်။

ကိုယ်မှတ်မှတ်ရရ ဖတ်ခဲ့ရတဲ့ စာအုပ်လေးနှစ်အုပ် ဘဝအကျိုးပေးခြင်း မတူပေမယ့် ချစ်သူတွေအပေါ် ချစ်ခင်မြတ်နိုးကြတာတူကြတဲ့ ပေးဆပ်ယုံ သက်သက် ချစ်ခဲ့ကြတဲ့ ကမ္ဘာကျော်ပုဂ္ဂိုလ်ကြီးတွေရဲ့ ချစ်သူမိန်းမသားနှစ်ဦးအကြောင်းကို ရင်ထဲမှာယနေ့တိုင် စွဲမြဲစွာ မှတ်မိနေဆဲ...

တစ်ဦးကတော့ ကမ္ဘာကျော် နာဇီခေါင်းဆောင်ကြီး ဟစ်တလာရဲ့ ချစ်သူ အီဗာဘရောင်း ပါ။ ဟစ်တလာရဲ့ နောက်ဆုံးနေ့များ စာအုပ်မှာသူမရဲ့ အကြောင်းကို ဖတ်ခဲ့ရတာတော့ ကြာပါပြီ။ ဒါပေမယ့် ယနေ့အချိန်ထိ စွဲစွဲမြဲမြဲ မှတ်မိနေဆဲပါ။ သူမ ဟစ်တလာနဲ့ အတူတူ Suicide လုပ်ခဲ့တဲ့ အချိန်မှာ ဟစ်တလာက ၅၆ နှစ်အရွယ် သူမကတော့ ၃၃ နှစ်ပဲရှိပါသေးတယ်။ အီဗာဘရောင်းဟာ သူမအသက် ၂၀ မှာ တကြိမ် အသက် ၂၃နှစ်မှာ တကြိမ် နှစ်ကြိမ်တိတိ Suicide လုပ်ခဲ့ဖူးတဲ့ ရာဇဝင်လဲရှိခဲ့ပါတယ်။

သူတို့နှစ်ယောက်ဟာ Suicide မလုပ်မီ နာရီလေးဆယ်အလိုမှာ တရားဝင် လက်ထပ်ခဲ့ပါတယ်။ လက်ထပ်ပွဲမှာတော့ သူမဟာ အီဗာဟစ်တလာ ဆိုတဲ့ နာမည်နဲ့ လက်မှတ်ရေးထိုးခဲ့ပါတယ်။ သူတို့ လက်ထပ်ပွဲမှာတော့ သူမဟာ အနက်ရောင် ပိုးထည် (နက်ပြာရောင် ပိုးထည်လို့လဲ ပြောကြပါတယ်) ကိုဝတ်ဆင်ခဲ့ပါတယ်။ သူမဟာ နောက်ဆုံးအချိန်အထိ ချစ်သူဟစ်တလာအနားမှာ အကြီးမားဆုံး တံတိုင်းကြီး အဖြစ်ရပ်တည်နိုင်ဖို့ သစ္စာတိုင်တည်ခဲ့ရပါသေးတယ်။


သူမဟာ ဟစ်တလာနဲ့ အတူ လက်တွဲလို့ ဘယ်ကိုမှ မသွားခဲ့ပါဘူး။ ဘယ်ပါတီ ဘယ်ဧည့်ခံပွဲကိုမှ မတက်ခဲ့ပါဘူး။ ချစ်သူနဲ့ မနီးမဝေး မှာသစ္စာရှိရှိ မားမားမတ်မတ် ရပ်တည်နေခဲ့သူတစ်ယောက်ပါ။ ငယ်ရွယ်နုပျိုလှပဆဲ တက်ကြွလန်းဆန်းဆဲ အချိန်မှာ ချစ်သူအတွက် အသက်ပေး၊ ဘဝပေးလို့ ချစ်ပြခဲ့တဲ့ သူမရဲ့ အချစ်ကို အံ့သြလေးစားမိပါတယ်။

"From our first meeting I swore to follow you anywhere even unto death.
I live only for your love."

အီဗာဘရောင်းက သူ့ချစ်သူဟစ်တလာကို ရေးခဲ့တဲ့ စာလေးပါ။ သာမန်ထက်ပိုတဲ့ အပြောသက်သက်မဟုတ်တဲ့ ပေးဆပ်ခြင်းသက်သက် ချစ်ခဲ့သူတစ်ယောက်အဖြစ် အီဗာကို အမြဲ သတိတရ ရှိနေပါတယ်။

နောက်တစ်ယောက်ကတော့ ကမ္ဘာကို ကိုင်လှုပ်ခဲ့တဲ့ အဲလ်ဗစ်ပရက်စလေရဲ့ တိတ်တခိုးချစ်ရသူလေး လူစီပါ။

သူမဟာ လူငယ်ကလေး တစ်ယောက်နဲ့ ချစ်ခဲ့တယ် အောင်မြင်တဲ့ သူကို ချစ်ခဲ့တာ မဟုတ်ပါဘူး။ လူတစ်ယောက်ကိုချစ်ခဲ့တယ်။ စူပါစတား တစ်ယောက်ကို ချစ်ခဲ့တာ မဟုတ်ပါဘူး။ သူတို့ နှစ်ယောက်ဆက်ဆံရေးဟာ အလျှံတညီးညီး တောက်လောင်မှု အဆင့်ထိ မရောက်ခဲ့သလို ဘယ်တော့မှလဲ အေးစက်မသွားခဲ့ပါဘူး။ ဆယ့်ခြောက်နှစ် သမီးအရွယ် ပထမဆုံးအချိန် ချိန်းတွေ့ခဲ့ရာက ပေါက်ဖွားလာတဲ့ အချစ်ကို နှစ်ဆယ့်လေးနှစ်လုံးလုံး ထိမ်းသိမ်း စောင့်ရှောက် ထားနိုင်ခဲ့တယ် ဆိုတော့ လူစီ့အချစ်က အိပ်မက်ထဲက အချစ်ကို မပုတ်မသိုးသွားရအောင် အအေးခန်းထဲထည့်ထားတာနဲ့တူတယ်....

လို့ လူစီအချစ်ကို ဖွင့်ဆိုခဲ့ပါတယ်။


Lucy De Barbin နဲ့ Dary Matera ရေးခဲ့တဲ့ Are you lonesome tonight ဆိုတဲ့ စာအုပ်လေးပါ။
ဆရာ ဝင်းငြိမ်းက အထီးကျန်ည ဆိုပြီး ဘာသာပြန်ထားပါတယ်။

စာအုပ်လေးကို လက်ထဲကမချချင်လောက်အောင် ဆွဲဆောင်မှုအပြည့်ရှိတဲ့ စာအုပ်လေးပါ။ လူစီရဲ့ မျက်ရည်တွေနဲ့ ရေးခဲ့တဲ့ စာအုပ်လေးမို့ ဖတ်ရင်းဖတ်ရင်း မျက်ရည်တွေဝိုင်းလို့ နှစ်ညလောက် မအိပ်ပဲ ဖတ်ခဲ့ရပါတယ်။

သူမတို့ရဲ့ လူမသိသူမသိ ကလေးဘဝကတည်းက အစပြုခဲ့တဲ့ ရင်မောစရာ ကြေကွဲစရာ အချစ်ဇာတ်လမ်းလေး ကို နှစ်နှစ်တိတိ အချိန်ယူပြီး ဇာတ်ကြောင်းပြန်ပြောခဲ့ရတဲ့ လူစီ့ရဲ့ တိတ်တခိုးအချစ်က နာကျင်မှု ကြေကွဲမှု လျှို့ဝှက်မှုတွေ စိတ်ဝင်စားမှုတွေ အပြည့်နဲ့ပါ။

အဲလ်ဗစ်ပရက်စလေ ကွယ်လွန်ပြီး နှစ်အစိတ်ကျော်ကြာမှာ ကမ္ဘာကို ချပြခဲ့တဲ့ အဲလ်ဗစ်တောင် မသိလိုက်ရတဲ့ ဒီဇိုင်းယားရီး ဆိုတဲ့ သမီးလေးတစ်ယောက် နဲ့သူမရဲ့ ကြေကွဲဖွယ် အချစ်ဇာတ်လမ်းလေးက ရင်နာစရာတွေ အတိနဲ့။

ဒီဇိုင်းယားရီး ဆိုတာက အဲလ်ဗစ်က လူစီကို ချစ်စနိုးနဲ့ ခေါ်တဲ့ နာမည်လေးပါ။

ကမ္ဘာက သိခဲ့တဲ့ လက်ခံခဲ့တဲ့ မိုက်ကယ်ဂျက်ဆင်ရဲ့ ဇနီးဟောင်း တစ်ယောက်ဖြစ်တဲ့ လီဆာမာရီ ပရက်စလေ အပြင် ဒီဇိုင်းယားရီးဆိုတဲ့ သမီးလေးတစ်ယောက်ရဲ့ ဖြစ်တည်မှု။ ဘယ်သူမှလဲမသိ ဒီဇိုင်းယားရီးလေးတောင် သူ့အမေ ပြောပြမှ သိခွင့်ရခဲ့တဲ့ ဇာတ်လမ်းလေးက လျှို့ဝှက် ဆန်းကြယ် ဝတ္တုလေးဖတ်နေရသလိုပါပဲ။