ဒူဘိုင်းမှာနေတဲ့ သူငယ်ချင်းတွေထဲက ပါတ်စ်ပို့စ်သက်တမ်းတိုးဖို့ မေးလာကြတဲ့သူငယ်ချင်းတွေအတွက် ဒီပို့စ်လေးကို ရေးပါတယ်..

ဒီမှာအလုပ်လုပ်နေတဲ့သူတွေထဲမှာ ရန်ကုန်ကို ခဏခဏပြန်နိုင်တဲ့သူတွေရှိသလို အကြောင်းအမျိုးမျိုးကြောင့် တစ်နှစ်တစ်ကြိမ်တောင် မပြန်ဖြစ်တဲ့သူတွေရှိပါတယ်။

ရန်ကုန်ကိုပြန်ဖို့ အဆင်မပြေတဲ့သူတွေကတော့ ကူဝိတ်နဲ့ အီဂျစ်နိုင်ငံက မြန်မာသံရုံးတွေကို စာအုပ်ပို့ပြီး သက်တမ်းတိုးကြပါတယ်။ တကယ်တော့ အရေးကြီးစာရွက်စာတမ်းတစ်ခုကို စာတိုက်ကနေပို့ရတာ အင်မတန် စွန်စားရတဲ့အလုပ်ပါ။ လမ်းမှာ စာအုပ်ပျောက်လို့ ဒုက္ခရောက်ခဲ့ဘူးတဲ့ သူငယ်ချင်းတွေလဲရှိပါတယ် ။ ဒါပေမယ့် မဖြစ်မနေပို့ရမယ့် အခြေအနေမှာတော့ စာတိုက်ကနေပို့ပြီး သက်တမ်းတိုးရတဲ့သူတွေများပါတယ်။

Passport စာအုပ် သက်တမ်းမကုန်ခင် ခြောက်လလောက်ဆိုရင် ဘယ်နိုင်ငံမှာပဲဖြစ်ဖြစ် သက်တမ်းတိုးလို့ရပါတယ်။ ဒူဘိုင်းမှာနေတဲ့ သူငယ်ချင်းတချို့ကတော့ စာအုပ်သက်တမ်းခြောက်လလောက်ကျန်တဲ့အချိန်မှာ ကူဝိတ်ကို ကိုယ်တိုင်သွားပြီး သက်တမ်းတိုးကြပါတယ်။ကိုယ်တိုင်သွားခြင်းအားဖြင့် လေယာဉ်စရိတ်ပိုလာပေမယ့် စိတ်ချလက်ချနဲ့ နေ့ချင်းပြီး သက်တမ်းတိုးလို့ရပါတယ်။ ဒူဘိုင်းကနေ ကူဝိတ်ကိုသွားဖို့ ဗီဇာမလိုပါဘူး။ မြန်မာလူမျိုးတွေဆိုက်ရောက်ဗီဇာ ရနိုင်ပါတယ်။

ရန်ကုန်မှာ သက်တမ်းတိုးမယ်ဆိုရင်တော့ စာအုပ်လက်ခံဖြတ်ပိုင်း(စလစ်)ရပြီးတဲ့နေ့ကနေ ဆယ်ရက်အတွင်းရနိုင်ပါတယ်။ ပိုက်ဆံအပိုပေးစရာမလိုပါဘူး။ စာအုပ်လက်ခံဖြတ်ပိုင်းရဖို့အတွက် အချိန် ၂ နာရီကနေ သုံးနာရီပဲကြာပါတယ်။ ပုံမှန်သက်တမ်းတိုးလိုသူတွေအတွက် မိတ္တူဖိုးမပါပဲ စုစုပေါင်း ၂၃၀၀၀ ကျပ်သာ ကုန်ကျမှာဖြစ်ပါတယ်။

ပထမဆုံး စာအုပ်အဟောင်း မူရင်းနဲ့ မိတ္တူ ၃ စုံ။ အိမ်ထောင်စုစာရင်းနဲ့ မှတ်ပုံတင် မူရင်းနဲ့ မိတ္တူသုံးစုံကို တပါတည်းယူသွားရပါမယ်။
ဆရာစံလမ်းက ပါတ်စပို့စ်ရုံးကိုရောက်တာနဲ့ ပုံစံဝယ်ဖို့ ငွေသွင်းပြီး ပုံစံထုတ်ယူရပါမယ်။ စာအုပ်လျှောက်လွာပုံစံနဲ့ ဓါတ်ပုံဖိုး ၃၀၀၀ကျပ် သွင်းပြီး ဓါတ်ပုံရိုက်ရပါမယ်။ ဓါတ်ပုံက နာရီဝက်အတွင်းရပါတယ်။ ဓါတ်ပုံရွေးဖို့စောင့်နေတုန်းမှာ ပုံစံ ၂ စုံဖြည့်ရပါမယ်။ အခုနောက်ပိုင်းမှာတော့ လျှောက်လွှာပုံစံတွေက အင်မတန်ကို ရိုးစင်းလွယ်ကူနေပါပြီ။

ဓါတ်ပုံရတာနဲ့ စာအုပ်ဖိုး ငွေ ၂၀၀၀၀ ကျပ်သွင်းရပါမယ်။ စာအုပ်ဖိုးသွင်းထားတဲ့ ဖြတ်ပိုင်းရတာနဲ့ စာရွက်စာတမ်း စစ်ဆေးတဲ့ ကောင်တာမှာ စာရွက်စာတမ်း စစ်ဆေးရပါမယ်။

လိုအပ်တဲ့ စာရွက်စာတမ်းတွေ စုံပြီဆိုတာနဲ့ လျှောက်လွှာလက်ခံတဲ့ ကောင်တာမှာ လျှောက်လွှာတင်ပြီး လက်ခံဖြတ်ပိုင်းလေးယူလို့ရပါပြီ။ လက်ခံဖြတ်ပိုင်းမှာ ပါတဲ့ နေ့စွဲကနေ ၁၀ ရက်ပြည့်ရင်တော့ ရုံးမှာ စာအုပ်ထုတ်လို့ရပါပြီ။
ပါတ်စ်ပို့စ်ရုံးက တနင်္ဂနွေတစ်ရက်ပဲ ပိတ်ပါတယ်။ စနေနေ့ကိုတော့ နေ့လည် ၁ နာရီအထိဖွင့်ပါတယ်။

၁၀ ရက်စောင့်ဖို့ အချိန်မရတဲ့သူတွေအတွက် အမြန်လျှောက်ထားလို့ရတဲ့ ကောင်တာတွေလဲရှိနေပါပြီ။ အလုပ်ကနေ ခွင့်နဲ့ ပြန်သွားသူတွေ အမြန်လျှောက်ထားတဲ့ ကောင်တာကိုသွားမယ်ဆိုရင်တော့ အလုပ်ကထုတ်ပေးတဲ့ ခွင့်စာပူးတွဲယူသွားရပါမယ်။

အောက်တိုဘာတုန်းက ရန်ကုန်မှာ စာအုပ်သက်တမ်းတိုးတော့ အခွန်ပေးစရာ အကြွေး ခြောက်လစာလောက်ကျန်ပါတယ်။ ဒါပေမယ့် စနစ်သစ် ဥပဒေသစ်အရ အခွန်ပေးစရာမလိုတော့ဘူးလို့ပြောပါတယ်။ သတ်မှတ်ကာလမတိုင်ခင် ပေးစရာရှိတဲ့ ခြောက်လစာ အခွန်ကိုပါ ကင်းလွတ်ခွင့်ရခဲ့ပါတယ်။

အခုနောက်ပိုင်းထုတ်ပေးတဲ့ စာအုပ်တွေရဲ့ သက်တမ်းက ၅ နှစ်ပါ။

စာအုပ်အမြန်လျှောက်လိုသူတွေရုံးကခွင့်စာ မပါရင်လဲ အနည်းသုံး ၂ ရက်ကနေ ၃ ရက်အတွင်း စာအုပ်ရဖို့ နည်းလမ်းလေးတွေ ရုံးမှာ ရှိနေတုန်းမို့ အချိန်တိုတိုနဲ့ စာအုပ်လျှောက်ထားနိုင်ပါပြီလို့ သတင်းကောင်းပါးအပ်ပါတယ်။